د جنډر او د ښځو او ماشومانو د ځورونې د مخنیوي قانون په تړاو د پوهاوي برنامه پيل شوه
دا برنامه د لويې څارنوالۍ د ښځو ملاتړ ریاست د ملګرو ملتونو د پرمختیايي پروګرام (UNDP) په مرسته د ۱۴۰۰ لمریز کال د چنګاښ پر ۲۱ پيل کړه.
د دغې برنامې موخه د جنډر او د ښځو او ماشومانو د ځورونې د مخنیوي قانون د مادو په اړه کارکوونکو ته پوهاوی بلل شوی دی.
دا پروګرام دوه ورځې دوام کوي او د لویې څارنوالۍ د بېلابېلو ریاستونو څارنوالان او کارکوونکي پکې د جنډر او د ښځو او ماشومانو د ځورونې د مخنیوي په اړه روزنه ترلاسه کوي.
په دې پروګرام کې د جنډر تعریف، د جنډر عدالت او برابري، جنسیتي پوهاوي او د جنسیتي کلیشو په اړه ګډونوالو ته روزنه ورکول کېږي.
د ښځو او ماشومانو د ځورونې د مخنیوي قانون عمومي احکام، اهداف او اصطلاحات، په لویه څارنوالي کې د ماشومانو د ځورونې د مخنیوي کمېټې دندې او واکونه، د ښځو او ماشومانو د ځورونې د مخنیوي قضیې محرمیت او شکایت ته رسیدګي نور هغه موارد دي، چې ټاکل شوې، په دې دوه ورځنۍ برنامه کې ګډونوالو ته تدریس شي.
