لویې څارنوالۍ د دغه ادارې مرکزي او ولایتي څانګو ته ۲۵ موټره توزېع کړل
لويې څارنوالۍ د دغې ادارې مرکزي او ولایتي څانګو ته د ټرانسپورټي ستونزو د له منځه وړلو په موخه ۲۲ کرولا ډوله او درې هایلکس موټره د روان کال د لیندۍ پر ۲۸ توزېع کړل.
د نوموړو وسایطو د توزېع مراسم د لویې څارنوالۍ د مالي او اداري مرستیال وحیدالدین ارغون په مشرۍ ترسره شول.
ښاغلي ارغون وویل، چې د هر کرولا (۲۰۱۷) موټر بیه دوه میلیونه او اتیا زره افغانۍ ده، چې ټولټال د ۲۲ کرولاوو بیه ۴۵ میلیونه، ۵۷۶ زره افغانۍ کېږي او د دې تر څنګ د هر هایلکس (۲۰۱۴) موټر بیه دوه میلیونه او ۴۲۵ زره افغانۍ ده، چې د درې واړو هایلکس موټرو بیه اووه میلیونه او ۲۷۵ زره افغانۍ کېږي.
ښاغلي ارغون زیاته کړه: «د یادو شویو وسایطو په استفادې سره به د دغه ادارې نژدې ۸۰ سلنه ټرانسپورټي ستونزې حل شي.»
نوموړی وايي، لویه څارنوالي په پام کې لري، چې په ۱۳۹۷ مالي کال کې هم د دغې ادارې د کارکوونکو د کاري اسانتیاوو په موخه ۲۳ کرولا موټرې او دوه امبولانسونه وپېري او د دغه وسایطو په پېرلو سره به د لویې څارنوالۍ د مرکزي او ولایتي څانګو ټرانسپورټي ستونزې هوارې شي.
ښاغلي ارغون موټر چلوونکو ته لارښوونه وکړه، چې له یادو شویو وسایطو څخه په احتیاط سره استفاده وکړي.
د یادونې وړ ده، چې اوسمهال د لويې څارنوالۍ په مرکزي اداره کې له ۸۳ موټرو څخه استفاده کېږي او د دې ادارې هره ولایتي څانګه له یوه موټر څخه تر درېيو موټرو پورې په اختیار کې لري.
