دوه څارنوالان د رشوت اخیستلو په جرم ونیول شول
کابل، د ۱۳۹۷ کال د غبرګولي ۱۷
د لویې څارنوالۍ د کنټرول او مراقبت ریاست دوه څارنوالان د رشوت اخیستلو په جرم نیولي او په دې اړه يې ترې پوښتنتې پيل کړې دي.
د کنټرول او مراقبت ریاست د معلوماتو پر اساس په تېره یوه میاشت کې دا درېیم څارنوال دی، چې د رشوت اخیستنې په جرم نیول کېږي. په اداري فساد او ناقانونه چارو کې د ککړو کسانو نيول او قانوني چلن ورسره کول د د لویې څارنوالۍ له اداري فساد سره د مخنیوي په لومړیتوب کې ده.
تر دې وړاندې هم په افغانستان کې د ملګرو ملتونو د مرستندویه پلاوي دفتر (UNAMA) په خپل وروستي راپور کې له اداري فساد سره د مبارزې په برخه کې د لویې څارنوالۍ هڅې ستایلې وې او زیاته کړې يې وه، چې لويې څارنوالۍ د روڼتیا او حساب ورکونې په برخه کې او همداراز له فساد سره مبارزه او رښتینولي عملاً ثابته کړې ده.
د افغانستان اسلامي جمهوري دولت لويې څارنوالۍ له خوا په ښار کې ګرځنده ګزمو او جدې څارنې په وروستي یوه کال کې اداري فساد ته د څارنوالانو لاس لنډ کړی دی.
په تېرو دوو کالو کې دغې ادارې په اداري فساد کې ښکېل ۳۴ کارکوونکي نیول شوي او دا له اداري فساد سره د لویې څارنوالۍ جدي مبارزه او نه زغم ښيي.
