لویې څارنوالۍ ته د تذکرو د پلور، جعل، تذویر، او د تذکرو په سټیکرونو کې د لاسوهنې ۲۴ دوسیې رسیدلې دي
د لویې څارنوالۍ ویاند جمشیدرسولي نن د غبرګولي پر ۲۵ د یو خبري کنفرانس له لارې د تذکرو د پلور، جعل، تذویر، او د تذکرو په سټیکرونو کې د لاسوهنې د ۲۴ دوسیو د ثبت خبر ورکړ.
د ښاغلي رسولي په خبره د دغو قضیو اړوند ۵۸ تنه نیول شوي دي، چې اوس په نظارت خونو کې د دوی قضیې تر څیړنې لاندې دي. د لویې څارنوالۍ ویاند زیاته کړه چې دا قضیې د لغمان، ننګرهار، هرات، کندز، کندهار، فاریاب، سرپل، پروان، خوست، پکتیا او بادغیس ولایتونو کې رامنځ ته شوی دي.
ښاغلي رسولي ټينګار وکړ: «په څو ورستیو ورځو کې د امنیتي او کشفي ادارو په هڅو او د ټاکنو له خپلواک کمېسیون سره په همغږۍ، ځینو کسانو چې غوښتل یې تذویري او جعلي تذکرې ثبت او ګټه ترې واخلي، نیول شوي او د قانون منګولو ته سپارل شوي دي.» هغه زیاته کړه، چې پر دغو کسانو تراوسه تور دی او د لویې څارنوالۍ له خوا په دې برخه کې څېړنې پیل شوې دي. د ښاغلي رسولي په خبره دا ډول قضیې لومړی د شکایاتو کمېسیون له خوا تثبیت کیږي او له هغې ورسته لویې څارنوالۍ ته استول کېږي.
ښاغلي رسولي بیا هم ټينګار وکړ:«لویه څارنوالۍ ژمنه ده، چې دا ډول قضیو ته هم د نورو قضیو په څېر په جدیت او پرېکنده دریځ سره رسیدهګي وکړي تر څو د قانون په رڼا کې عدالت او انصاف رعایت شي.»
هغه زیاته کړه چې د دغو قضیو تر څیړنو وروسته که نورو کسانو هم په دې قضیو کې لاس درلود، د قانون منګولو ته به وسپارل شي.
ښاغلي رسولي د خپلو خبرو په دوام سره وویل چې د ټاکنو د سرغړنو اړوند قضیو ته د سمې رسیدهګۍ په موخه د مسلکي زدهکړو انستیتیوت خپلو کارکوونکو ته د رڼو او عادلانه ټاکنو د ترسره کیدو په موخه د ټاکنو او جزایي قانون اړوند روزنیز پروګرامونه په پام کې لري.
