په لویه څارنوالۍ کې د ټاکنیزو جرمونو روزنیز پروګرام جوړ شو
دغه پروګرام د لویې څارنوالۍ د مسلکي زده کړو انستیتیوت ریاست لخوا د ۱۳۹۷ کال د چنګاښ پر نولسمه د یاد شوي ریاست په تالار کې جوړ شو.
په دغه پروګرام کې د مرکز او ولایتونو د استیناف څارنوالیو نږدې ۳۷ څارنوالانو ګډون کړی و.
د مسلکي زده کړو انستیتیوت رئیس او د لویې څارنوالۍ ویاند څارنیار جمشېد رسولي په دغه پروګرام کې وویل، چې یاد شوی ریاست د دغه پروګرام د جوړونې پوره چمتوالی لري. د نوموړي په خبره، یاد شوي پروګرامونه د ادارو د اړتیا له مخې جوړیږي. ښاغلي رسولي زیاته کړه، چې دغه پروګرامونه د مسلکي زده کړو انستیتیوت لخوا د هېواد په کچه د ترسره شوې سروې له مخې طرحه او پلان شوي او پلې کیږي. نوموړي د دغه پروګرامو د جوړونې موخه، د ټاکنیزو جرمونو څېړنه او یو شان اجراات وبلل. نوموړي زیاته کړه: «هغه قضیې چې څارنوالۍ ته استول کیږي، په دقت، بې پرې او خپلواکه توګه څېړل کیږي.»
ښاغلي رسولي څارنوالانو ته په اشارې سره وویل، چې د ټاکنیزو جرمونو اړوند قضیې په دقت، سرعت او همغږۍ سره وڅېړي چې قانون یو شان واکمن او عدالت تأمین شي.
دا په داسې حال کې ده چې د مسلکي زده کړو انستیتیوت، څه موده مخکې د ولایتونو د استیناف څارنوالیو رئیسانو ته هم د ټاکنیزو جرمونو روزنیز پروګرام جوړ کړی و.
