د استیناف څارنوالیو رئیسانو ته د ټاکنیزو جرمونو روزنیز پروګرام جوړ شو
دغه روزنیز پروګرام د لویې څارنوالۍ د مسلکي زده کړو انستیتیوت ریاست له خوا، د استیناف څارنوالیو رئیسانو ته د ټاکنیزو جرمونو په اړه د ۱۳۹۷ کال د چنګاښ پر دولسمه د یاد شوي ریاست په تالار کې جوړ شو.
د مسلکي زده کړو انستیتیوت رئیس او د لویې څارنوالۍ ویاند څارنیار جمشېد رسولي، د دغه پروګرام موخه د ټاکنو قانون تحلیل او د ټاکنیزو جرمونو او سرغړونو څېړنه وبلله. نوموړي زیاته کړه :«څوک چې د قانون خلاف کړنو سره د خلکو په برخلیک لوبې کوي، عدلي او قضایي بنسټونه به ورسره د یوه بنسټ په توګه قانوني چلند وکړي.» نوموړي ټینګار وکړ، چې د ټاکنیزو شکایتونو له کمېسیون سره لازمه همغږي د عدالت د لا ټینګښت سبب کېږي. ښاغلي رسولي د استیناف څارنوالیو رئیسانو ته په اشارې سره وویل، چې د ټاکنیزو جرمونو اړوند قضیې د هېواد د نافذه قوانینو په رڼا کې وڅېړي.
د یادونې وړ ده، چې دغه پروګرام به دوه ورځې دوام وکړي او په راتلونکې اوونۍ کې به د ولایتونو د استیناف څارنوالیو او مرکز ځينو څارنوالانو ته هم جوړ شي.
