لویه څارنوالي کې د مېرمنو د خوندي کاري چاپیریال د پالیسۍ جوړونې مشورتي ناسته وشو
د لويې څارنوالۍ د جنډر او پلان ریاستونو په دغه اداره کې د مېرمنو د خوندي کاري چاپيریال د پالیسۍ جوړونې مشورتي ناسته د ۱۳۹۷ کال د زمري پر ۲۴ وکړه.
په یاده شوې ناسته کې د جنډر د رئیسي لیدا حیدري په ګډون د دغې ادارې ګڼو ښځینه او نارینه کارکوونکو ګډون کړی و.
د جنډر رئیسې دا مشورتي ناسته د مېرمنو د خوندي کاري چاپيریال د خوندیتوب پالیسۍ د لا غنامندۍ په برخه کې ګټوره وبلله او زیاته يې کړه، چې دا پالیسي به د همکارانو او د لويې څارنوالۍ د ښځینه کارکوونکو د نظریاتو پر اساس جوړېږي.
نوموړې زیاته کړه، موږ د یوې نیازسنجۍ له مخې اړینه وبلله، چې داسې پالیسي جوړه کړو، چې مېرمنې په ډاډه زړه په دغه اداره کې دندې پر مخ بوځي.
اغلي حیدري وویل: «د جڼدر ریاست یوه بنسټيزه دنده مېرمنو ته د خوندي کاري چاپيریال چمتو کول دي، که موږ خوندي کاري چاپیریال رامنځته کړو، په اداره کې د مېرمنو د ونډې په زیاتوالي او د چارو د لا ښه تنظیم په برخه کې له موږ سره مرسته کولای شي.»
په یاده شوې پاليسۍ کې به له مېرمنو سره د تبعیضي او تریخ چلن پر له منځه وړنې، مېرمنو ته د کاري سهولتونو پر برابرونې او پر ګڼو نورو داسې مسايلو ټینګار وشي، چې مېرمنو ته کاري استانیاوې رامنځته کوي.
