څوک چې پیاده روونه بندوي په نقدي ډول جریمه کېږي
دا موضوع د کابل د جنوب زون څارنوالۍ ریاست، د دغه ریاست د بېلابېلو څانګو د امرینو او د لومړۍ، دویمې، اوومې او اتمې حوزې د رئیسانو او امرینو تر منځ په یوه ناسته کې مطرح شوه.
د دغه ناستې موخه، د څارنوالۍ، د حوزو د امرینو او د یادو شویو څلورو ناحیو د رئیسانو تر منځ لا همغږي، په ښار کې د جرمونو د کچې ټيټوالی، د ناپلانه او خپل سرو ودانیو د جوړولو مخنیوی، د رېړۍ والو تنظیمول او د ښاریانو د تګ راتګ په موخه د پیاده روونو پاکوالی وبلل شول.
د دغه ناستې ګډونوالو پرېکړه وکړه، چې اړونده ناحیې باید د خپل سرو او ناپلانه ودانیو د ثبت او جوړېدنې اسناد د حوزو تر تایید وروسته څارنوالۍ ته هم واستوي.
د یادې شوې ناستې د ګډونوالو د پرېکړې پر اساس، څوک چې د عمومي سړکونو او پیاده لارو په بندولو سره د ښاریانو تګ راتګ له ستونزو سره مخ کوي، د جزا کود د ۹۰۸ او ۹۰۹ مادو پر بنسټ له پنځه تر لس زره نقدي جریمه محکومېږي.
د دې ناستې ګډونوالو، د یادو شویو چارو د څارنې او ښو اجرااتو په موخه د دا ډول ناستو پر دوام ټینګار وکړ.
