له ایران څخه ۱۰۰ افغان بندیان افغانستان ته انتقال شول
د افغانستان اسلامي امارت او د ایران اسلامي جمهوري دولت ترمنځ د لاسلیک شوې هوکړې له مخې چې د بندیانو د انتقال او د هغوی د حقونو د ملاتړ په هکله ده، ۱۰۰ افغان بندیان افغانستان ته انتقال شول.
دا زندانیان د ۱۴۴۴ هجري قمري کال د ذوالقعده الحرام پر ۲۲ په نیمروز کې افغان لوري ته وسپارل شول.
دا بندیان د ایران په بېلابېلو زندانونو کې بندیان وو، چې له پخوانیو ژمنو سره سم افغانستان ته انتقال شوي دي. دغه راز ۲۶۰ نور افغان بندیان به هم په نږدې راتلونکي کې افغانستان ته وسپارل شي.
تر دې وړاندې د دغې هوکړې په لومړي پړاو کې ۸۵۸ افغان بندیان چې په ایران کې بندیان وو، افغانستان ته انتقال شوي وو.
دغه راز د ښه نیت او بالمثل عمل په توګه به ۴ ایراني بندیان چې افغانستان کې بندیان او محکوم دي، د ایران اسلامي جمهوري دولت چارواکو ته وسپارل شي.
افغانستان ته د افغان محکومینو انتقال ایران ته د فرمانونو او حکمونو د تقعیب او نظارت لوی رییس مولوي شمس الدین شریعتي په مشرۍ لوړپوړي پلاوي له سفر وروسته پیل شوی دی. په دې سفر کې دواړو لورو د افغان اتباعو د حقوقو د ملاتړ په موخه یو لړ ژمنې لاسلیک کړې دي.
د یادونې وړ ده، چې په بهرنیو هېوادونو کې د افغان بندیانو، مظنونانو او تورنو د انتقال کمېټه د ا.ا.ا د فرمانونو او حکمونو د تعقیب او نظارت لوی ریاست په مشرۍ جوړه شوې ده. په دې کمټېه کې د بهرنیو چارو، کورنیو چارو، د کډوالو او بېرته راستنېدونکو چارو او عدلیې وزارتونه او د زندانونو د تنظیم ادارې استازي غړي دي.
