د زندانیانو د انتقال کمېټې غړو ناسته وکړه
دا ناسته د ا.ا.ا د فرمانونو او حکمونو د تعقیب او نظارت لوی رییس محترم مولوي شمسالدین شریعتي په مشرۍ د ۱۴۴۴ هجري قمري کال د ذوالحجې پر ۲۷ د یاد ریاست د شهرنو په ودانۍ کې جوړه شوه.
ناسته د قران پاک د مبارکو آیتونو په تلاوت پیل شوه.
په دې ناسته کې تر هر اړخیز بحث وروسته پرېکړه وشوه، چې له بهرنیو چارو وزارت څخه د دغې کمېټې له مطالبې وروسته د افغانستان د اتباعو د شهرت له رسېدو سره دې دا تر توحیدولو او لیست کولو وروسته بیرته د بهرنیو چارو وزارت ته واستول شي؛ ترڅو موضوع د هغوی د هویت له تثبیت وروسته ډيپلوماټیکو مجراوو ته راپور ورکړي او اړین اجراات وشي.
دغه راز په دې ناسته کې د سترې محکمې عالي مقام ته وړاندیز وشو، چې د هغه افغان بندي په هکله چې د چین په ولسي جمهوریت کې محکوم او په زندان کې وفات شوی و، په هغه هېواد کې یې د تدفین په هکله د اسلامي شریعت د حنفي فقهې له مخې اړینه لارښونه وړاندې کړي.
دا ناسته د افغانستان خلکو ته د خیر په دعا پای ته ورسېده.
د یادونې وړ ده، چې په بهرنیو هېوادونو کې د افغان بندیانو د انتقال کمېټې له دې وړاندې هم ځینې ناستې کړې دي.
د دغې کمېټې په هلو ځلو په بهرنیو هېوادونو کې ځینې محکوم شوي افغان بندیان هېواد ته رالېږدول شوي او دا لړۍ لا هم روانه ده.
