د لویې څارنوالۍ د بشري سرچینو رییس د کابل پوهنتون د حقوقي زده کړو له ملي مرکز څخه لیدنه وکړه
د لویې څارنوالۍ د بشري سرچینو رییس محمد ناصر همت او د نوموړې ادارې کارکوونکو د ۱۳۹۶ کال د لیندۍ پر ۱۱ د کابل پوهنتون د حقوقي زده کړو له ملي مرکز څخه لیدنه وکړه. د نوموړې لیدنې موخه په یاد مرکز کې د محصلانو پر وړاندې د ننګونو پېژندنه او د هغوی د ستونزو اورېدنه بلل شوې ده.
د بشري سرچینو رییس محمد ناصر همت د یاد مرکز محصلانو ته په اشارې وویل، تاسو به له نوموړي مرکز څخه تر فراغت وروسته د یوې رڼې پروسې له لارې د مسلکي شخص په توګه په لویه څارنوالۍ کې جذب شئ.
ښاغلي همت زیاته کړه، د لويې څارنوالۍ په مسلکي او اداري برخو کې اشخاص د وړتیاوو پر اساس جذب او د یوې رڼې پروسې له لارې په کار ګمارل کېږی. نوموړي ټینګار وکړ، چې له افرادو سره له شخصي اړیکو پرته خپل اجراات ترسره کوي.
د بشري سرچینو رییس زیاته کړه، تاسو باید په خپل ځان او خپلو زده کړو ډاډه واوسئ. ښاغلي همت په دې اړه وویل، موږ د معیارونو له مخې هغه کسان چې لوړې نومرې ترلاسه کوي، په دنده ګومارو.
په نوموړي مرکز کې د محصلانو حاضري ته د پاملرنې په اړه هم خبرې وشوې، په دې اړه ښاغلي همت وویل، چې محصلان باید خپلې حاضري پوره پام وکړي.
په ورته مهال کې د کابل پوهنتون د حقوقي مرکز د دارالانشا آمر محمد وصیل شرافت د لویې څارنوالۍ د بشري سرچینو د رییس څخه مننه وکړه او ویې ویل، چې تر دې وړاندې د لویې څارنوالۍ د ګومارنې او بشري سرچینو مسوولانو د نوموړي حقوقي مرکز څخه لیدنه نه وه کړې. ښاغلي شرافت زیاته کړه، دا ډول لیدنې له یوې خوا زده کوونکو ته روحیه ورکوي او له بلخوا د محصلانو د تشویق سبب کېږي.
په کابل پوهنتون کې د حقوقي ستاژ د مرکز د دارالانشا آمر وویل، نوموړي مرکز ته سل محصلان د کانکور او سل نور په مستقیم ډول له دولتي ادارو څخه جذب کېږي، چې په دې وروستیو کې یې شمیر زیات شوی دی.
له بل پلوه د دغه مرکز محصلانو د ښوونیز میتود او د استادانو له ښه چلند څخه خوښي څرګنده کړه او ویې ویل، چې دا مرکز د مسلکي پوهې په برخه کې ورسره زیات مرستندوی ثابت شوي دي.
د بشري سرچینو رییس د یاد روزنیز مرکز له محصلانو سره ژمنه وکړه، هغه کسان چې د مسلکي پوهې سره سره یې د دغې ادارې د کار ګومارنې معیارونه بشپړ کړي وي، په دغه اداره کې به په دنده وګومارل شي.
د کابل پوهنتون د حقوقي زده کړو ملي مرکز د ۱۳۸۶ کال د غبرګولي پر ۱۹ نېټه د جمهوري ریاست د حکم پر اساس د یوه خپلواک عدلي رسمي مرکز په توګه د عدلي او قضايي ارګانونو د ادارې د کارکوونکو او د حقوقو او شرعیاتو د پوهنځیو د فارغانو لپاره تاسیس شو.
نوموړی روزنیز مرکز په ۱۳۹۰ کال د غبرګولي په ۲۹ نېټه د کابل پوهنتون په چوکاټ خپل فعالیت پیل کړ او تر دې دمه له نوموړي مرکز څخه ګڼ شمېر محصلان فارغ شوي دي.
