د لویې څارنوالۍ له ښځو سره د تاوتریخوالي د مخنیوي، د ماشومانو د سرغړونو او د بشري حقونو د ملاتړ مرستیالۍ د کورنیو ستونزو د حل په موخه ناسته وکړه
د لویې څارنوالۍ له ښځو سره د تاوتریخوالي د مخنیوي، د ماشومانو د سرغړونو او د بشري حقونو د ملاتړ مرستیالۍ، د کابل ښار د امنیتي حوزو د کورنیو ستونزو د حل آمریتونو او د ګذر له وکیلانو سره د کورنیو ستونزو د حل په موخه ګډه ناسته وکړه.
دا ناسته د ۱۳۹۷ کال د وري پر ۱۵ د کابل امنیې قوماندانۍ د غونډو په تالار کې د IDLO (د حقوقو د پراختیا نړيوال سازمان) په مرسته وشوه او د لويې څارنوالۍ د عسکري استیناف څارنوالۍ رئيس محمد نواب احمدزي، له ښځو سره د تاوتریخوالي، د ماشومانو د سرغړونو او بشري حقونو د ملاتړ مرستیالۍ مشاور عبدالحمید صمدي، د کابل ښار د امنیتي حوزو د کورنیو ستونزو د حل آمرانو او د ګذر وکیلانو ګډون پکې کړی و.
په نوموړې ناسته کې محمد نواب احمدزي وویل، د يوه هېواد برخلیک په سالمې کورنۍ پورې تړاو لري او لویه څارنوالي هڅه کوي، چې په امنیتي حوزو کې د کورنیو ستونزو د حل آمرانو په مرسته ورته مشکلات حل کړي.
ښاغلي احمدزي زیاته کړه: «موږ د فساد پر ضد مبارزه کوو او له نېکه مرغه اوسمهال لویه څارنوالۍ د هېواد د اتباعو لپاره د ډاډ وړ مرجع ګرځېدلې ده.»
هغه ټینګار وکړ، چې د کورنیو ستونزو د حل پر مهال باید موظف کارکوونکي د کورنیو عزت ته پوره پام وکړي.
له دې سره سم عبدالحمید صمدي د کورنیو ستونزو د حل له آمرانو څخه وغوښتل، چې د لويې څارنوالۍ له ادارې سره خپله همغږي لا پياوړې وساتي او هغه ستونزې چې د کورنیو د خپلمنځيو شخړو له امله رامنځته شوې وي، د امکان په صورت کې په امنیتي حوزو کې حل کړي.
ښاغلي صمدي د کورنیو ستونزو د حل آمرانو ته په خطاب کې وویل: «په امنیتي حوزو کې د کورنیو شخړو له امله د رامنځته شویو ستونزو حلول د دې سبب کېږي، چې دا ډول قضیې په لنډ وخت کې حل شي.»
د یادونې وړ ده، چې د لویې څارنوالۍ له ښځو سره د تاوتریخوالي د مخنيوي، د ماشومانو د سرغړونو او د بشري حقونو د ملاتړ مرستیالۍ تر دې وړاندې هم د کابل له ۱۰۱ آسمايي زون سره د ښځو پر ضد د تاوتریخوالي د مخنيوي په موخه ګډه ناسته کړې وه.
