د سیمه ییزو ارګانونو په خپلواکه اداره کې له ښځو سره د تاوتریخوالي پر ضد د پوهاوي غونډه وشوه
دغه غونډه د لويې څارنوالۍ له ښځو سره د تاوتریخوالي، د ماشومانو د سرغړونو او د بشري حقونو د ملاتړ مرستیالۍ له خوا د حقوقو د پراختیا نړیوال سازمان (IDLO) په مرسته د ۱۳۹۷ کال د وري پر ۱۵ وشوه. په دغه غونډه کې د یادې شوې ادارې د بېلابېلو برخو کارکوونکو ګډون کړی و.
د یادې شوې مرستیالۍ د ښځو پر وړاندې د تاوتريخوالي د کمولو آمریت امرې عاطفې حرمت وویل، له ښځو سره د تاوتریخوالي د مبارزې په اړه د ښځو پوهاوی د دغه آمریت موخه ده.
د آغلې حرمت په خبره، د لويې څارنوالۍ له ښځو سره د تاوتریخوالي، د ماشومانو د سرغړونو او د بشري حقونو، د ملاتړ مرستیالۍ او د یادې شوې مرستیالۍ له ښځو سره د تاوتریخوالي د کمولو آمریت کوښښ کوي، چې له ښځو سره د تاوتریخوالي د پوهاوي پروګرامونه ټولو دولتي او نادولتي ادارو ته وغځوي.
نوموړې زیاته کړه، له ښځو سره دتاوتریخوالي د قضیو د شميرو او علتونو پیدا کول هم د یاد شوي آمریت دنده ده او دغه آمریت په ۱۳۹۶ کال کې په مرکز او ولایتونو کې له ښځو سره د تاوتریخوالي دوه زره قضیې ثبت کړې دي.
د سیمه ییزو ارګانونو د خپلواکې ادارې د جنډر آمرې حمیدې احمدي، له ښځو سره د تاوتریخوالي له قانون څخه د ښځو ناخبرې د دوی پر وړاندې یوه ننګونه وبلله. نوموړې د خپلو خبرو په تړاو زیاته کړه:«له ښځو سره د تاوتریخوالي د مبارزې د پوهاوي پروګرام د ښځو د پوهاوي د کچې لوړولو تر څنګ د دوی پر وړاندې د تاوتریخوالي کچه هم کمولای شي.»
دا په داسې حال کې ده، چې دغه آمریت څه موده مخکې هم د پوهنې په وزارت کې د ښځینه کارکوونکو لپاره له ښځو سره د تاوتریخوالي د مبارزې د پوهاوي پروګرام جوړ کړی و.
