لویه څارنوالۍ خپلو کارکوونکو ته د انګلیسي او کمپيوټر زده کړې روزنیز پروګرام پيلوي
لویې څارنوالۍ د Homestay په نامه له یوه مشورتي او تدریسي خصوصي ادارې سره د قرارداد له مخې د دغې ادارې کارکوونکو ته د انګلیسي او کمپيوټر زده کړې نهه میاشتني روزنیز پروګرام پيلوي.
په دغه پروګرام کې د ګډون په موخه د لويې څارنوالۍ د بشري سرچینو د پراختیا عمومي ریاست د ظرفیت لوړونې آمریت د دغې ادارې له ځینو کارکوونکو څخه د شمولیت ازموینه واخیسته. دا ازموینه د ۱۳۹۷ کال د چنګاښ پر ۲۶ د لويې څارنوالۍ د کتابتون په تالار کې واخیستل شوه.
په دغه ازموینه کې یو تن ګډونوال تیمورشاه فصیحي د شمال زون ریاست کارکوونکي وویل، چې د انګلیسې ژبې او کمپیوټر زده کړه د کارکوونکو ظرفیت لوړوي. ښاغلي فصیحي زیاته کړه: «تر رسمي وخت وروسته د ستړیا په سبب نه شي کولای، له ادارې بهر د انګلیسي او کمپيوټر زده کړو ته دوام ورکړي.» نوموړي د لویې څارنوالۍ له رهبرۍ د دا ډول پروګرامونو د ترسراوي له امله مننه وکړه.
په دغو ټولګیو کې به تر ازموینې وروسته ۱۶۰ زده کوونکي ومنل شي او ټاکل شوې ده، چې اته ټولګي به د لويې څارنوالۍ په دارالامان او دوه نور به د لويې څارنوالۍ په نوي ښار ودانۍ کې پيل شي.
