څلور تنه د پيسو مینځلو په تور محاکمه شول
دغه څلور تنه د اداري فساد پر وړاندې د مبارزې عدلي او قضایي مرکز لخوا د ۱۳۹۷ کال د چنګاښ پر ۲۶ د پیسو مینځلو او ناقانونه عوایدو په تور په ښکاره ډول محاکمه شول.
په دغه قضایي ناسته کې، نورالله د رحمت ګل زوی، نورالله د محمد رحیم خان زوی، محمد علی او غلام جیلاني د پیسو د غیر قانوني لېږد په تور محاکمه شول.
د دغه قضایي ناستې پلاوي، د جزا کود د پنځمې او ۱۷ مادې او د جزایي اجرااتو قانون د پنځمې مادې او همداراز د اساسي قانون د ۲۵ مادې له مخې نوموړو کسانو ته چې په دغه قضیه کې یې جزایي مسؤولیت نه درلود برائت ورکړ.
د دغه محکمې د پرېکړې له مخې، د ۲۹۹ زره او ۹۵۰ ضبط شویو امریکایي ډالرو په اړه، د پیسو مینځلو او ناقانونه عوایدو، د پیسو د لېږد راپور ورکونې او د مقررې د احکامو د کنټرول، په سرحدي ګمرکونو کې د بې نومه اسنادو او اسعارو د مخنیوي په موخه د یاد شوي قانون د ۷ مادې له مخې اړونده څانګو ته هدایت ورکړل شو، چې په دغه برخه کې لازم اجراات وکړي.
