د جلال اباد پر سیکانو او هندوانو د حملې په اړه څېړنه پیل شوه
یوه پلاوي د جمهوري ریاست د ۹۷۷ ګڼې فرمان له مخې، چې د ۱۳۹۷ کال د زمري پر ۲۵ صادر شوی و، پر سیکانو او هندوانو د یادې شوې پېښې د پېښېدو او د عواملو د څرنګوالي د څېړلو په موخه ټاکل شوی دی. یاد شوي پلاوي، له نړیوالو جرمونو سره د مبارزې څارنوالۍ رئیس او د لوی څارنوالۍ د با صلاحیته استازي داوود افضلي په مشرۍ خپله څېړنه د وږي پر ۱۳ پیل کړه.
د مخکینیو امنیتي تدابیرو د نیولو، د بېلابېلو څانګو د مسؤولینو د وظیفوي غفلت د احتمالي مواردو د پېژندنې، د اصنافو د امنیت د خودیتوب او د اجرااتو څېړنه د دغه پلاوي دندې او مسؤولیتونه دي.
د جمهوري ریاست د حکم له مخې، د ملي امنیت د عمومي ریاست او د سیمه ییزو بنسټونو د خپلواکې ادارې باصلاحیته استازي هم په دغه پلاوي کې ګډون لري. د یاد شوي حکم له مخې، ټاکل شوی پلاوی باید د خپلو لاسته راوړنو راپور، په یوه میاشت کې د ځانګړو وړاندیزونو د طرحې په توګه په پرلپسې ډول جمهوري ریاست ته وړاندې کړي. همداراز لېږل شوي پلاوي د ننګرهار ولایت له مسؤولینو وغوښتل، چې په یاد شوي ولایت کې د سیکانو او هندوانو ملاتړ وکړي.
د یاد شوي کاري سفر په دوو وروستیو ورځو کې د پلاوي رئیس او دوه څارنوالانو خپلې لاسته راوړنې د ننګرهار ولایت له مقام سره شریکې کړې، چې د دوی لاسته راوړنې د دغه ولایت د مسؤولینو لخوا تائید شوې.
دغه پلاوی به د یادې شوې پېښې د هراړخیزې څېړنې او د کشفي، امنیتي او بشري حقونو له مسؤولینو او همداراز د ولایتي شورا له ځينو غړو او د یاد شوي ولایت له اوسېدونکو سره تر خبرو اترو وروسته خپلې لاسته راوړنې جمهور رئیس ته وړاندې کړي.
