لویې څارنوالۍ د خبریالانو پر وړاندې د تاوتریخوالي ۵۰ قضیې څېړلې دي
د افغانستان د اسلامي جمهوري دولت لویه څارنوالي، ځان د هېوادوالو د حقونو او ازادیو ملاتړه او مدافع بولي او د دغه مسؤولیت په درک کولو سره یې د خبریالانو پر وړاندې د تاوتریخوالي قضیې، چې په هېواد کې د رسنیو او د بیان ازادۍ پر وړاندې یوه ننګونه بلل کیږي، څېړلې دي.
د افغانستان د اسلامي جمهوري دولت لویه څارنوالي د بیان پر ازادۍ باور لري او درناوی ورته لري. دغه اداره په هېواد کې د قانون د تنفیذ او تطبیق کوونکي بنسټ په توګه او همداراز هغه بنسټونه چې د عدلي تګلارې په وسیله د خبریالانو ملاتړ کوي؛ د خبریالانو پر وړاندې د تاوتریخوالي قضیې په جدي توګه څېړي. لویې څارنوالۍ د خبریالانو پر وړاندې د تاوتریخوالي ۵۰ قضیې، چې یادې شوې ادارې ته رسېدلې، په عادلانه او منصفانه توګه څېړلې او د دغو قضیو عاملین یې محکوم کړي دي. د یاد شمېر قضیو له جملې څخه ۳۳ قضیې د حکومت او رسنیو تر منځ د ګډې کمېټې(د خبریالانو د امنیت، خوندې کاري چاپېریال او د دوی پر وړاندې د تاوتریخوالي د څېړنې کمېټه) له پیل مخکې او پاتې نورې یې د یادې کمېټې له جوړېدو وروسته دغې ادارې ته رسېدلې دي.
د یادونې وړ ده، چې دغه قضیې په کابل، ننګرهار، هرات، غور، نیمروز، فراه، کندهار، بلخ، بادغیس، زابل، خوست، پروان، کاپیسا او بغلان کې پېښې شوې، چې د وژنې، وهلو ډبولو، توهین، ګواښ، جعلي خبر، ناقانونه نیونې، ځان وژنې، وسلوال برید، رادیو سوځونې، تښتونې او داسې نورو په اړه دي.
د دغو قضیو مرتکین په نغدي جریمه، بند او حتی په اعدام محکوم شوي دي.
د افغانستان د اسلامي جمهوري دولت لوی څارنوال څارنپوه محمد فرید حمیدي د ورته قضیو د جدي او پر وخت څېړنې په موخه، په مرکز او ولایتونو کې د یادې شوې ادارې ټولو څانګو ته هدایت کړی، چې د خبریالانو پر وړاندې د تاوتریخوالي قضیو د موندلو پر وخت دې د قضیې ابتدایي معلومات له مرکزي ادارې سره شریکوي او له دې وروسته دې د قضیې د پر وخت څېړنې په موخه لیکلی راپور مرکزي اداري ته استوي.
د افغانستان د اسلامي جمهوري دولت لویه څارنوالي د بیان ازادي او د رسنیو فعالیت د دولت له بنسټیزو لاسته راوړنو ګڼي او دغه اداره به یې د ملاتړ په موخه قانوني هڅې وکړي. د افغانستان خلک او رسنۍ دې ډاډه وي، چې دغه اداره د خبریالانو پر وړاندې د تاوتریخوالي قضیې د کره اسنادو، شواهدو او مدارکو پر بنسټ په پرېکنده او جدي توګه څېړي او پایلې یې له هېوادوالو سره شریکوي.