په لویه څارنوالي کې نوې ګومارنې
د لویې څارنوالۍ په پیشنهاد او د افغانستان اسلامي جمهوري ریاست عالي مقام د حکم پر اساس د لويې څارنوالۍ پخوانی مالي او اداري مرستیال وحیدالدین ارغون په فوق بست کې د لویې څارنوالۍ د منابع او ادارې د عمومي رئیس، شمس الله احمدزی د لويې څارنوالۍ د کورني او بهرني امنیت ضد جرایمو پر ضد د مبارزې څارنوالۍ عمومي رئیس په توګه وګومارل شول.
همداراز د دغې ادارې په وړاندیز او د افغانستان اسلامي جمهوري ریاست عالي مقام په منظورۍ د اداري فساد د لویو جرمونو پر ضد د مبارزې عدلي او قضايي مرکز کې له اداري فساد سره د مبارزې د پياوړتیا او اصلاحاتو په موخه، رزغونه سهاک د اداري فساد د لویو جرمونو پر ضد د مبارزې عمومي ریاست د سترې محکمې د رئيسې، عاشور بیک د ابتداییه څارنوالۍ د رئیس، دوست محمد د اداري فساد د لویو جرمونو پر ضد د مبارزې عدلي او قضايي مرکز د اسیتناف څارنوالۍ د رئیس، احمد ادریس د جرایمو د تحقیق څارنوالۍ د رئیس، ضیاالحق د عدلي او قضايي مرکز د اجرايي رئيس، شیرمحمد د عسکري جرایمو د تحقیق څارنوالۍ د رئیس، نجیب الله د عسکري استیناف څارنوالۍ د رئيس او مبارک شاه د عسکري ابتداییه څارنوالۍ د رئيس په توګه تعیین او معرفي شول.
د دغو کسانو د معرفۍ په موخه د ۱۴۰۰ لمریز کال د غويي میاشتې پر ۱۸ یوه غونډه د دغې ادارې د مرستیالانو په ګډون ترسره شوه.
د قضايي تعقیب په چارو کې د لوی څارنوال مرستیال ډاکټر غلام حیدر علامه، نوي رئیسانو ته د مبارکۍ تر څنګ وویل، لویه څارنوالي په دولت کې د مهم بنسټ په توګه، له ستونزو او ناامنیو سره سره په خپلواکه توګه او د انصاف اصل په نظر کې نیولو سره د عدالت تأمین او د قانون تطبیق ته ژمنتیا لري.
د ښاغلي علامه په باور، په اداره کې تغییر او تبدیل یو اصل دی او نوې ګومارنې د لا زیاتو اصلاحاتو په موخه شوې دي. نوموړي له نویو ګومارل شویو رئیسانو وغوښتل، چې په صادقانه او خپلواکه توګه دې د قانون د احکامو په رڼا کې خپلې دندې پر مخ یوسي او د اداري فساد د له منځه وړلو په برخه کې دې هڅې وکړي.
د لویې څارنوالۍ د منابع او ادارې عمومي رئيس وحیدالدین ارغون د دولت او لویې څارنوالۍ د مجدد باور مننه وکړه او ویې ویل، چې خپل کاري لومړیتوبونه به له اړوندو مرستیالیو او ریاستونو سره په همغږۍ، جدي هڅو او له اداري فساد سره په مبارزې او روڼتیا پر مخ بیايي.
له بلې خوا، نوي ګومارل شويو رئیسانو، د لويې څارنوالۍ د رهبرۍ د باور مننه وکړه او ژمنه يې وکړه، چې په خپلو اجرااتو کې به خپلواک او اجراات به يې صادقانه او د قانون په رڼا کې وي او د اداري فساد له شومې پدیدې سره به د مبارزې په برخه کې له هېڅ ډول هڅې مخ نه اړوي.
