د لویې څارنوالۍ د مسلکي بستونو ازموینه واخیستل شوه
په دې ازموینه کې د لویې څارنوالۍ له مرکز او ولایتونو څخه د ښځو او نارینه وو په ګډون ۱۷۱ کارکوونکو اشتراک کړی و، چې له دې ډلې ۹۰ کسان به د څارنوال په توګه وګومارل شي.
دا ازموینه د سرچینو او منابع د عمومي رئیس وحیدالدین ارغون، د بشري سرچینو د پراختیا عمومي رئیس محمد نواب احمدزي، د ولسي جرګې د عدلي او قضايي کمېسیون مرستیال همایون شهیدزاده او د لويې څارنوالۍ د ځینو نورو رئیسانو په حضور د ۱۴۰۰ لمریز کال د غبرګولي پر لومړۍ واخیستل شوه.
د لویې څارنوالۍ د سرچینو او ادارې عمومي رئیس وحیدالدین ارغون د دې ازموینې په پرانیسته کې وویل، چې لویه څارنوالي د عدالت د تأمین او د حاکمیت په پراختیا کې مهم او اساسي رول لري. ښاغلي ارغون د لویې څارنوالۍ د کارکوونکو پر ظرفیت لوړاوي ټینګار وکړ او زیاته يې کړه: «هېوادوالو ته غوره عدلي خدمتونه د کارکوونکو په مسلکي ظرفیت پورې اړه لري او لويې څارنوالۍ په دې وروستیو کې د دغې ادارې کارکوونکو ته ګڼ لنډمهالي او اوږدمهالي روزنیز پروګرامونه جوړ کړي دي.»
ښاغلي ارغون د دغې ازموینې د روڼتیا په تړاو ډاډ ورکړ او ويې ویل، دا پروسه د بېلو کاري کمېټو په ایجاد، د څارنوالانو د ګومارنې له کړنلارې سره سم ترسره شوې ده. د نوموړي په وینا، د ازموینې د پایلې تر اعلان وروسته، د پایلو په تړاو شکایت کوونکي خپل شکایت د بشري سرچینو د پراختیا عمومي ریاست ته کتاباً لېږلی شي او موظفه کمېټه به دغو شکایتونو ته رسیدګي وکړي.
په ورته وخت کې، د لویې څارنوالۍ د بشري سرچینو د پراختیا عمومي رئیس محمد نواب احمدزي وویل، چې دا ازموینه د لويې څارنوالۍ هغو کارکوونکو ته چې له کلونو راهیسې يې په اداري برخو کې کار کاوه، ترسره شوې ده. د نوموړي په وینا، په دې ازموینه کې د ۲۲ مېرمنو په ګډون ۱۷۱ کسانو له مرکز او ولایتونو څخه ګډون کړی دی.
ښاغلي احمدزي همداراز وویل: «موږ هڅه کوو، چې وړ کسان له دې لارې بریالي ووځي او ډاډ ورکوو، چې دا ازموینه په رڼه، مسلکي او عادلانه توګه ترسره کېږي. د ځوابویونکې او خدمتپالې ادارې په موخه به د سمونونو لړۍ روانه وي.»
بلخوا د ولسي جرګې د عدلي او قضايي کمېسیون مرستیال همایون شهیدزاده وویل، چې د لویې څارنوالۍ د نوې رهبرۍ په راتګ سره د دې ادارې په بېلابېلو برخو کې جدي سمونونه راوستل شوي دي. نوموړي په رڼه توګه د دې ازموینې د ترسراوي له کبله مننه وکړه او ويې ویل، د ولسي جرګې عدلي او قضايي کمېسیون په لویه څارنوالي کې د سمونونو، هېوادوالو ته د ښو خدمتونو د وړاندې کولو او د مسلکي کادرونو د ګومارنې ملاتړ کوي.
دغې اموینې ته د شرعیاتو او حقوقو پوهنځیو فارغان او کومو کارکوونکو چې درې کاله په دې اداره کې کار کړی و، انتخاب شوي دي.
دا په داسې حال کې ده، چې په لویه څارنوالي کې د سمونونو د راوستلو په موخه وړمه ورځ د دغې ادارې په مرکز او استیناف څارنوالیو کې ۴۳ رئيسان وګومارل شول.
