د لویې څارنوالۍ عالي شورا غونډه وشوه
د لویې څارنوالۍ د عالي شورا غونډه د سرپرست لوی څارنوال محترم ذبیح الله کلیم په مشرۍ د ۱۴۰۰ لمریز کال د چنګاښ پر ۱۷ وشوه.
په پيل کې سرپرست لوی څارنوال محترم ذبیح الله کلیم د دښمنانو پر ضد د هېواد د امنیتي او دفاعي ځواکونو وروستۍ لاسته راوړنې وستایلې او د امنیتي او دفاعي ځواکونو او په لوګر او خوست ولایتونو کې د دوو څارنوالانو د شهادت لپاره يې دعا وکړه.
د غونډې په لومړۍ برخه کې د جمهوري ریاست د ۱۳۹۹/۹/۱۸ نېټې د ۳۳۸۶ ګڼې هدایت د لومړي مورد د تعمیل او د افسوتر شرکت او اریانا ټیلیکام خصوصي شرکت ترمنځ د قرارداد قضیې د رسیدګۍ د څرنګوالي راپور د تفتیش څارنوالۍ د رئيس له خوا غونډې ته وړاندې شو.
د غونډې ګډونوالو د راپور په تړاو تر بحث وروسته د کورني تفتیش ریاست راپور تایید کړ او د اداري فساد پر ضد د مبارزې څارنوالۍ د پنځو څارنوالانو دنده یې دغې قضیې ته د رسیدګۍ پر مهال د وظیفوي جرم د ارتکاب له کبله تعلیق کړه او د اداري فساد د لویو جرمونو پر ضد د مبارزې عدلي او قضايي مرکز رئيس ته يې دنده وسپارله چې د دوو څارنوالانو په ملتیا دې له یادو شویو څارنوالانو څخه تحقیق وکړي او خپلې موندنې دې د عالي شورا راروانې غونډې ته وړاندې کړي.
د غونډې په دویمه برخه کې په لویه څارنوالي کې د ښځو د خوندي کاري چاپيریال پالیسي د دغې ادارې د ښځو د ملاتړ رئيسې له خوا وړاندې شوه.
د عالي شورا ګډونوالو تر هراړخیز بحث وروسته د ښځو د ملاتړ ریاست او د موظفې کمېټې چې د دغې پالیسۍ په طرح کې يې هڅه کړې وه، مننه وکړه او د ښځو د ملاتړ ریاست، د اطلاعاتو او عامه اړیکو، پلان، پالیسۍ او نظارت او د مسلکي زده کړو انستیتوت ریاستونو ته يې دنده وسپارله چې د دې طرحې بیاکتنه وکړي.
د غونډې په دویمه برخه کې د اداري فساد د لویو جرمونو پر ضد د مبارزې عدلي او قضايي مرکز عمومي رئيس له خوا د جزايي دوسيې د ترتیب لارښود مسوده غونډې ته وړاندې شوه.
د عالي شورا غونډې ګډونوالو د دغه لارښود د تدوین د موظفې کمېټې څخه په مننې سره د دې لارښود په تړاو هراړخیز بحث وکړ او خپل نظریات يې د لا ښه والي لپاره ارایه کړل. دغې شورا یاد شوی لارښود په پرنسیب کې تایید کړ او موظفې کمېټې ته يې دنده وسپارله چې د عالي شورا نظریات په دغه لارښود کې ورزیات او په پښتو او دري ملي ژبو دې ترجمه او تکثیر شي.
