د ننګرهار د فرمانونو او حکمونو د تعقیب او نظارت لوی ریاست کارکوونکو ته روزنیز سیمنار جوړ شو
د ننګرهار د فرمانونو او حکمونو د تعقیب او نظارت ریاست خپلو مسلکي او اداري کارکوونکو ته روزنیز سیمنار جوړ کړ. دا روزنیز پروګرام چې د ننګرهار د قبایلو او سرحدونو چارو ریاست د غونډو په تالار کې جوړ شوی و، د ۱۴۴۵ هجري قمري کال د ربیع الثاني پر دویمه پای ته ورسېد.
دا سیمینارونه د مرکز په ګډون د ولایتونو د ریاستونو او د فرمانونو او حکمونو د تعقیب او نظارت آمریتونو مسلکي غړو ته په ملکي، نظامي، استخباراتو او د ملي دفاع وزارت(قول اردوګانو او د ولایتونو فرقو) او د هېواد په کچه د ولسوالیو مسلکي غړو لپاره په پام کې نیول شوې دي.
د دغه روزنیز سیمینار موخه، په امارتي او له امارتي ادارو سره اړوند خصوصي ادارو کې د ا.ا.ا د مشرتابه د فرمانونو، حکمونو او هدایاتو د تعقیب او نظارت ډول او څرنګوالی، په اړوندو ادارو کې د اجرااتو د قانونیت نظارت او له امارتي او خصوصي مراجعو له مسوولینو سره د دغې ادارې د مسلکي غړو چلند او د همکارۍ څرنګوالی، د تقنیني سندونو رعایت او تطبیق، له اداري فساد څخه مخنیوی، یادو مراجعو کې د مؤثریت او روڼتیا رامنځته کول او په هېواد کې د اسلامي نظام لا بقا په ګوته شوی دی.
د دغه سیمینار ګډونوالو د خپلو وړاندیزونو، غوښتنو او نظرونو د څرګندولو سربېره دا ډول سیمینارونه اغېزناک وبلل او د نورو روزنیزو پروګرامونو د جوړېدو غوښتنه یې وکړه.
یاده دې وي، چې د فرمانونو او حکمونو د تعقیب او نظارت لوی ریاست د خپلو کارکوونکو د لاظرفیت لوړونې لپاره ورته روزنیز سیمینارونه په نورو ولایتونو کې هم جوړ کړې دي او دا لړۍ دوام لري.
د ویلو ده، چې دا روزنیز سیمینارونه د رییسانو، مشایخو، علمای کرامو، کارپوه او تجربه لرونکو ښوونکو په ګډون د اتو کمېټو له لوري مخته وړل کېږي.
