د فرمانونو او حکمونو د تعقیب او نظارت لوی ریاست د دعوت او ارشاد ریاست د دې ادارې له کارکوونکو د دیني مسائلو ازموینه واخیستله
د ا.ا.ا د فرمانونو او حکمونو د تعقیب او نظارت لوی ریاست د دعوت او ارشاد ریاست د دغې ادارې له کارکوونکو د دعوت او ارشاد د عمومي ریاست نصاب ازموینه واخیستله.
دا ازموینه چهارشنبه د ۱۴۴۷ هـ.ق کال د ربیعالاول پر ۲۴ (د ۱۴۰۴ کال د وږي میاشتې ۲۶) د دې ادارې په ټولو مرکزي ودانیو کې اخیستل شوې ده.
په دې ازموینه کې ټولو (مسلکي، اداري او خدماتي) کارکوونکو ګډون کړی و.
د دې ازموینې موخه د دیني موضوعاتو په اړه د کارکوونکو د پوهاوي کچې لوړول او د زدهکړو لپاره هڅونه بلل شوې ده.
د دې ازموینې پوښتنې له هغو برخو راغلې وې چې له دې وړاندې د دعوت او ارشاد ریاست له خوا یې تدریس شوی و؛ لکه د جهاد مسائل، اسلامي حکومتولي، عدل او انصاف، نیت او اخلاص، د وخت ارزښت او معاملات.
د ازموینې پوښتنې په (پښتو او دري) ژبو جوړې شوې وې څو د ګډونوالو لپاره اسانتیا رامنځته شي.
د دې ازموینې بهیر د روڼتیا، نظم او کیفیت لپاره د دعوت او ارشاد ریاست د مسوؤلانو له خوا وڅارل شوه.
د یادونې وړ ده چې د فرمانونو او حکمونو د تعقیب او نظارت لوی ریاست د دعوت او ارشاد ریاست، د دې ادارې د کارکوونکو لپاره هر کال د دعوت او ارشاد د عمومي ریاست نصاب روزنیز پروګرامونه جوړوي چې بنسټيزه موخه یې د دیني پوهاوي کچې لوړول، د اخلاص او مسوولیت روحیې پیاوړې کول او د اسلامي حکومتولۍ اصول دي.
