د کندز استیناف څارنوالۍ ریاست د روان کال په پنځو وروستیو میاشتو کې ۱۱۶ جنايي قضیې ثبت کړې او څېړلې دي
د افغانستان اسلامي جمهوري دولت لویې څارنوالۍ، د هېواد د نافذه قوانینو، بشري حقونو او عدالت ته د هېوادوالو د لاسرسي په رعایتونې سره د ۱۳۹۸ کال د غویي میاشتې له لومړۍ نېټې څخه د تلې تر پایه د کندز استیناف څارنوالۍ له لارې، د جنایي برخې ۱۱۶ قضیې په پرېکنده، بې پرې او خپلواکه توګه څېړلې دي.
له یاد شمېر قضیو څخه ۹۰ قضیې د اتهام نامو له ترتیب وروسته محکمو ته استول شوې، چې په ۷۲ یې پرېکړه کړې او پاتې یې تر کار لاندې دي.
همداراز له دغو قضیو څخه ۷ جرمي قضیې د مناسبو دلیلونو د نشتون له امله ساتل شوې او ۲۰ نورې د همدې ریاست تر څېړنو لاندې دي.
د راغلي راپور پر بنسټ، له دغو قضیو څخه ۳۳ قضیې د وهلو ډبولو او وژنې، ۵۰ د نشه یي توکو د قاچاق، ۱۷ د غلا، شپږ د اخلاقي جرمونو(زنا او لواطت) او ۱۰ نورې د ترافیکي پېښو په اړه دي.