د کندوز د فرمانونو او حکمونو د تعقیب او نظارت ریاست کارکوونکو ته روزنیز سیمینار پیل شو
د فرمانونو او حکمونو د تعقیب او نظارت لوی ریاست په مرکز او ولایتونو کې د دغې ادارې کارکوونکو ته د روزنیزو سیمینارونو لړۍ پیل کړې ده.
دا سیمینارونه د مرکز په ګډون په ۳۴ ولایتونو کې د اتو جوړو شویو کمېټو له لوري مخته وړل کېږي.
په همدې لړ کې د کندوز د فرمانونو او حکمونو د تعقیب او نظارت ریاست کارکوونکو ته هم د ۱۴۴۵ هجري قمري کال د ربیعالثاني پر نهمه روزنیز سیمینار پیل شو.
د دغه سیمینار د جوړېدو موخه د فرمانونو او حکمونو د تعقیب او نظارت لوی ریاست د کارکوونکو د ظرفیت لوړول، په امارتي او له امارتي ادارو سره اړوند خصوصي ادارو کې د ا.ا.ا د مشرتابه د فرمانونو، حکمونو او هدایاتو د تعقیب او نظارت ډول او څرنګوالی، په اړوندو ادارو کې د اجرااتو د قانونیت نظارت او له امارتي او خصوصي مراجعو له مسوولینو سره د دغې ادارې د مسلکي غړو چلند او د همکارۍ څرنګوالی، د تقنیني سندونو رعایت او تطبیق، له اداري فساد څخه مخنیوی، یادو مراجعو کې د مؤثریت او روڼتیا رامنځته کول او په هېواد کې د اسلامي نظام لا بقا په ګوته شوی دی.
ورته مهال په کندوز کې د مؤظف شوې کمېټې مسوولینو د دغه ولایت له والي سره په لیدنه کې د یاد روزنیز سیمینار د جوړېدو اهداف شریک کړل او له نوموړي یې د همکارۍ غوښتنه وکړه.
د کندوز والي د دغه سیمینار د جوړېدو هرکلی وکړ او د کمېټې غړو ته یې د پوره همکارۍ ډاډ ورکړ.
دا روزنیز سیمینارونه د اتو کمېټو له لوري چې غړي یې د دغې ادارې ځینې رییسان، مشایخ، علمای کرام، کارپوه او تجربه لرونکو ښوونکي دي، مخته وړل کېږي.
