لويې څارنوالۍ د جنډر په اړه د پوهاوي دوه ورځنی پروګرام پيل کړ
د لويې څارنوالۍ جنډر ریاست د افغانستان د عدلي سکتور د ملاتړ پروګرام (JSSP) ادارې په مرسته د دغې ادارې په دارالامان ودانۍ کې د جنډر په اړه د پوهاوي پروګرام پيل کړ.
دغه پروګرام د جنډر رئیسې لیدا حیدري په مشرۍ د ۱۳۹۶ کال د کب پر ۲۷ پيل شو او د دغه ریاست د آمرې نرګس نعیمي له لوري به د دوو ورځو لپاره د اړونده موضوعاتو په اړه ګډونوالو ته روزنه ورکړل شي.
د دغه پروګرام په پرانیسته کې لیدا حیدري وویل، چې د جنډر په اړه مقدماتي پوهاوی د ادارې هر کارکوونکي ته اړین دی او دا پروګرام هم د جنډر ریاست او د لويې څارنوالۍ د نورو ریاستونو تر منځ د لا همغږۍ لپاره ترسره کېږي.
په دغه پروګرام کې د لویې څارنوالۍ د بېلابېلو ریاستونو څخه پر مېرمنو سربېره نارینه وو هم ګډون کړی.
اغلې حیدري زیاته کړه: «د دغه پروګرام موخه په لویه څارنوالۍ کې د جنډر متوازنه وده او په ټولنه کې د ښځو او سړیو مسؤولیتونو ته د هغوی پام وراړول دي.»
د یادونې وړ ده، چې د جنډر ریاست به په نژدې راتلونکي کې دا ډول پروګرامونه ولایتونو ته هم وغځوي، چې د لويې څارنوالۍ په اداره کې د مېرمنو او سړیو تر منځ کاري همغږي پياوړې شي.
