لویې څارنوالۍ د دغې ادارې د کارکوونکو د ظرفیت لوړونې په موخه روزنیز پروګرام پيل کړ
لویې څارنوالۍ د دغې ادارې د آمریت او مدیریت په کچه د ظرفیت لوړونې دوه ورځنی روزنیز پروګرام پیل کړ.
د دغه پروګرام په پرانیسته کې د لویې څارنوالۍ بشري سرچینو رییس محمد ناصر همت او د دغې ادارې ګنو کارکوونکو ګډون کړی و.
ښاغلي محمد ناصر همت وویل، چې د افغانستان خلک سالمې ادارې ته اړتیا لري او موږ هغه وخت د ولس او حکومت تر منځ واټن رالنډوی شو، چې سالمه اداره ولرو.
ښاغلي همت زیاته کړه: «موږ باید کار اهل کار ته وسپارو، که کار وړ کسانو ته وسپارل شي، له موږ سره د سالمې ادارې په رامنځته کولو کې مرسته کولای شي.»
یاد شوی پروګرام د بشري سرچینو ریاست د ظرفیت لوړونې آمریت او د JSSP ادارې په مرسته پيل شوی او دوه ورځې به دوام وکړي. په دغه پروګرام کې به د لويې څارنوالۍ د ادارې آمرانو او مدیرانو ته د سالمې ادارې په اړه لارښوونه وشي او د سالمې ادارې په رامنځته کولو کې به ورته روزنه ورکړل شي.
د یادونې وړ ده، چې لویه څارنوالۍ به په نژدې راتلونکي کې د ریاستونو په سطحه هم ورته روزنیز پروګرامونه هم پيل کړي.
