د افغانستان اسلامي جمهوري دولت لویې څارنوالۍ رهبرۍ د ډاډګیرنې پیغام
بِسْمِ اللّٰهِ الرَّحْمٰنِ الرَّحِيمِ
وَ بَشِّرِ الصَّابِرينَ أَلَّذينَ إِذا أَصابَتْهُمْ مُصيبَةٌ قالُوا إِنَّا لِلَّهِ وَ إِنَّا إِلَيْهِ راجِعُونَ
په ډېره خواشینۍ سره مو خبر تر لاسه کړ، چې د ۱۳۹۸/۸/۲۰ د یکشنبې شپه، د خوست ولایت د علي شېر ولسوالۍ د ابتدایه څارنوالۍ امریت څارنوال ښاغلی وطنیار او ورسره څلور پولیس د دندې د اجرا پر مهال د دولت د وسله والو مخالفینو له خوا په شهادت رسېدلي دي.
د افغانستان د اسلامي جمهوري دولت د لویې څارنوالۍ رهبري، د دغه دردوونکې او غموونکې پېښې په اړه د شهیدانو کورنیو، خپلوانو او د هېواد شریفو او متدینو خلکو ته د تسلیت مراتب وړاندې کوي. خدای بښلو ته د لوی خدای له دربار څخه د مغفرت او کورنیو او دوستانو ته یې د جمیل صبر غوښتنه کوي.
د افغانستان د اسلامي جمهوري دولت لویه څارنوالي یو ځل بیا ټينګار کوي، چې دا ډول ظالمانه کړنې د عدالت د تأمین او د قانون د حاکمیت په برخه کې د دغې ادارې په پرېکنده اراده کې آن یو وړوکۍ خنډ هم نشي جوړولای. د لویې څارنوالۍ کارکوونکي، په هر ډول شرایطو کې په ټینګ عزم او هوډ سره د افغانستان د عزتمنو او شریفو خلکو خدمت ته چمتو دي.
د لویې څارنوالۍ رهبرۍ، د ورته انسانیت او شریعت خلافه حملو د غندنې تر څنګ، د یادې پېښې د جدي او قانوني څېړنې په موخه پلاوی ټاکلی، څو د یادې قضیې عاملین وپېژني او د قانون منګولو ته یې وسپاري.
په درناوي
د افغانستان د اسلامي جمهوري دولت د لویې څارنوالۍ رهبري
۱۳۹۸ کال د لړم ۲۰، کابل- افغانستان