د قضیو د مدیریت سیسټم د نظارت پلاوي شپږمه ناسته وشوه
دا غونډه د افغانستان د اسلامي جمهوري دولت لویې څارنوالۍ د قضیو د مدیریت د سیسټم د رئیسې نګینه خلیلي په ریاست د ۱۳۹۹ لمریز کال د سلواغې پر ۳۰ د سترې محکمې د ناستو په تالار کې وشوه.
په دې غونډه کې د ماليې، ملي دفاع، کورنیو چارو او عدلیې وزارتونو، سترې محکمې، د زندانو د چارو د تنظیم ادارې، د احصايې او معلوماتو د ملي ادارې، د ملي امنیت عمومي ریاست او د مدافع وکیلانو د خپلواک انجمن استازو ګډون کړی و.
په دې غونډه کې د قضیو د مدیریت سیسټم د کیفیت د تضمین د نهايي کولو، حقیقي او حکمي اشخاصو ته د معلوماتو د ارایه کولو، د قضیو د ثبت په مدیریت کې د مسلکي کارکوونکو د پلان شاملولو، د نیولو د قرارونو، د عدلي او قضايي ملي پرورګرام کې د قضیو د مدیریت سیسټم د ادغام او ورقي فورمونو سیسټم په تړاو بحث وشو.
په دې غونډه کې پرېکړه وشوه، چې د سیسټمونو لازم معلومات دې د توحید لپاره سترې محکمې ته ولېږل شي. په ورته وخت کې د کیفیت د تضمین لارښود هم راروانې غونډې ته ارایه شي. د دې غونډې ګډونوالو پرېکړه وکړه، چې په راروانه ناسته کې دې د قضیو د ثبت په مدیریت کې د مسلکي کارکوونکو د پلان شاملول ترتیب او همداراز د ادارو د استازو له خوا د نظریات جمع بندي هم په ورقي فورم کې د عدلي سکتور د ملاتړ دفتر له خوا اضافه او د تصویب لپاره راروانې ناستې ته چمتو شي.
په دې غونډه کې همداراز پرېکړه وشوه، چې د قضیو د سیسټم د مدیریت د ښه والي په موخه د اړوندو ټولو ادارو استازي ځان مکلف وګڼي چې له ماليې وزارت سره دې په Justice NPP غونډو کې ګډون وکړي او د قضیو د مدیریت سیسټم دې په دې پروګرام کې شامل کړي.
