زمري میاشتې دویمې نیټې پیښې له ځای څخه د څیړنې کمیسیون رئیس لیدنه
دغه کمیسیون چې د هیواد لوی څارنوال څارنپوه محمد فرید "حمیدی" تر مشری لاندې د جمهور رئیس لخوا د زمري میاشتې دویمې نیټې د پیښی هراړخیزې څیړنې لپاره ټاکل شوی وو د زمري په دریمه نیټه د یکشنبې په مازدیګر د موظف ټیم چې د کورنیو چارو او ملي امنیت ارګانونو له استازو څخه تشکیل شوی وو، یوځای په لاریون کونکو باندې د تروریستي پیښې له ځایه لیدنه وکړه.
د دې کمسیون رئیس د هیواد لوی څارنوال څارنپوه محمد فرید "حمیدي" په عسکري چارو کې د لویې څارنوالۍ مرستیال، ملي امنیت څارنوالۍ رئیس، کورنیو چارو وزارت د څارنوالی رئیس او کابل ولایت جنایي جرمونو سره د مبارزې تحقیقاتو رئیس سره یو ځای ددې پیښې د واقع کیدو څرنګوالي د څیړنې لپاره د پیښې له ځای څخه لیدنه وکړه.
د کابل ولایت جنایي جرمونو سره مبارزې د تحقیقاتو رئیس د وینا پر بنسټ د زمري میاشتې ۲ نیټې د یکشنبې په پیښه کې زمونږ۸۱ تنه هیوادوال شهیدان او تر ۲۰۷ تنو پوری ټپیان شویدی.
دغه تروریستي برید د کابل ده مزنګ په څلورلارې کې د زمري په ۲ نیټه یکشنبې په ورځ پداسی حال کی ترسره شوی وه چی زمونږ یو شمیر هیوادوال د یو سوله ایزه لاریون لپاره دغه ځای کی راغونډ شوي وه چه ددغی ګڼی ګوڼی په منځ کی ځانمرګۍ برید ترسره شو او په پایله کی یی ۸۰ تنو څخه زیات شهیدان او تر ۲۰۰ تنو څخه زیات ټپیان کړل.
