ښځو پر وړاندې د تاوتریخوالي مخنیوي ځانګړي څارنوالۍ د همغږۍ څلورمه ناسته کابل کې ترسره شوه

د لویې څارنوالۍ مسلکي زده کړو انستیتوت د حقونو پراختیا نړیوال سازمان په همکارۍ، ښځو پر وړاندې د تاوتریخوالي مخنیوي ځانګړې څارنوالۍ عمومي ناسته ترسره کړه.

پدغې ناسته کې چې نن دوشنبه د زمري پر ۱۸ مه کابل کې ترسره شوه، پوهنملې ملیحه حسن، مالي او اداري چارو کې د لوی څارنوالۍ مرستیاله، ماری لو شرام، د حقونو پراختیا نړیوال سازمان رئیسه، د لویې څارنوالۍ ځیني مرکزي رئیسانو او ښځو پر وړاندې د تاوتریخوالي مخنیوي ځانګړي څارنوالۍ ولایتي مسؤولینو ګډون کړی و.

پوهنملې ملیحه حسن، د لوی څارنوالۍ مالي او اداري مرستیالې چې د دې پروګرام پیلوونکې وه، لوی څارنوالۍ سره د حقونو پراختیا نړیوال سازمان له همکاریو په مننې وویله:" موږ د خپل همکارانو ظرفیت لوړلو په لړ کې په خاصه بیا ښځو پر وړاندې د تاوتریخوالي مخنیوي ځانګړي څارنوالۍ په برخه کې، هلې ځلې کوو. دا هلې ځلې د هیواد د ښځو د وضعیت ښه والي دپاره دي. ښځو پر وړاندې د تاوتریخوالي مخنیوي څارنوالانو د پوهې کچې لوړول کولای شي موږ سره د افغانستان د ښځو د حقونو په ساتنه کې مرسته وکړي."

آغلې ماری لو شرام، د حقونو پراختیا نړیوال سازمان (IDLO) رئیسه، ښځو پر وړاندې د تاوتریخوالي مخنیوي ځانګړي څارنوالۍ څارنوالان یې د افغانستان د عدلي او قضایي نظام مهمه برخه وګڼله. د هغې په باور دغه کسان دا وړتیا لري څو قانون پلی کړي.

هغې ښځو پر وړاندې د تاوتریخوالي مخنیوي څارنوالانو سره په اشارې، زیاته کړه: " تاسو کولای شئ افغانستان کې د ښځو او ماشومانو حقونو څخه ملاتړ وکړئ. همداراز تاسو دا وړتیا لرئ څو یو با ثباته او قانونمند هیواد رامنځته کړئ. که تاسو دا اراده لرئ، نو د حقونو پراختیا نړیوال سازمان به په جدي توګه پدې لړ کې تاسو سره مرسته وکړي."

دا پروګرام به درې ورځې دوام وکړي. د حقونو پراختیا نړیوال سازمان د لوی څارنوالۍ یو له مهمو تمویل کوونکو څخه دی. دا سازمان له څو کاله پدیخوا ښځو پر وړاندې د تاوتریخوالي مخنیوي ځانګړي څارنوالۍ عمومي ناسته ترسره کوي. په دغو ناستو کې افغانستان کې د ښځو د وضعیت ښه والي پر وړاندې پرته ستونزو، ننګونو او پر کړنلارو بحث ترسره کیږي.  

"