لویې څارنوالۍ عالي شورا غونډه د څارنپوه ښاغلي محمد فرید حمیدی، هیواد لوی څارنوال تر مشرۍ ترسره شوه
لوی څارنوالۍ عالي شورا غونډه د دې ادارې مرستیالانو او رئیسانو په ګډون پر مهمو موضوګانو بحث ترسره او پریکړه وکړه. لومړی د اجندا سره سم د څارنوالانو عمومي کنفرانس پر جوړولو بحث ترسره شو. څارنپوه ښاغلي محمد فرید حمیدي یادونه وکړه څو د ښو کړنو هڅونې په موخه، ۴۰ تنه څارنوالان د لویې څارنوالۍ غوره کارکوونکو په توګه وټاکل شي او د کنفرانس په ترڅ کې ورنه درناوی وشي. همداراز، د لویې څارنوالۍ عالي شورا غړي پر دې خبرې تاکید وکړ چې د لویې څارنوالۍ شهیدانو تکریم او درناوي لپاره د شهید اوونۍ په لړ کې د دوی کورنیو په شتون کې یادونه ترسره شي. په تیرو کلونو کې په لسګونو څارنوالانو د هیواد په ګوټ ګوټ کې د عدالت احیا او د قانون تطبیقولو په موخه خپل ژوند له لاسه ورکړی دي.
د لویې څارنوالۍ عالي شورا غونډې په دویمه برخه کې یوه کمیټه مؤظف شوه څو د لویې څارنوالۍ، عدلیې وزارت، سترې محکمې، کار او ټولنیزو چارو وزارت، داخلې وزارت او د ماشومانو ټولنیز سوکالۍ مؤسسې (موسسې رفاه اطفال) تر منځ د همکارۍ تفاهم لیک متن وارزوي، تدقیق کړي او منظورولو لپاره یې چمتو کړي. تمه کیږي څو دغه تفاهم لیک د یاد ادارو ترمنځ د حجز د بدیل کارولو تحکیم په موخه لاسلیک شي.
همداراز، د لویې څارنوالۍ عالي شورا غړو د دې ادارې دا ګام چې د هرات ولایتي شورا رئیس ښاغلي کامران علی زي څخه د تحقیق په موخه پورته کړې د قانون حاکمیت په لور هڅه په ګوته کړه. څارنپوه ښاغلي محمد فرید حمیدی، د هیواد لوی څارنوال یادونه وکړه چې لوی څارنوالۍ د خلکو عزت او کرامت په پام کې نیولو سره هیڅ یو مقام ته د قانون ماتولو اجازه نه ورکوي. همداراز، ښاغلي حمیدی دا یادونه هم وکړه چې د هیواد امنیت شورا د لوی څارنوالۍ دغه ګام چې د زورویلو او قانون ماتونې پر ضد یې پورته کړې، ستایي او خپل ملاتړ ترې اعلانوي. د هیواد لوی څارنوال په ډاګه کړه چې غواړو د افغانستان خلکو ته دا پیغام ورسوو چې په هیواد کې قانون ماتونې او زور ویلو ته به اجازه ورنکړو.
د لوی څارنوالۍ عالي شورا غونډې په پای کې هغه مډالونه کوم چې د جمهوري ریاست عالي مقام له لوري د دغې ادارې نظامي څانګې دوه کارکوونکو ته په پام کې نیول شوي و، وروسپارل شو. دغه مډالونه د زمري ۲۸ مې زموږ د خوږ هیواد آزادۍ کلیزې په مناسبت هر یو دګر جنرال فضل کریم سادات او تورن جنرال محمد قایم قایم ته د جمهوري ریاست عالي مقام فرمان له مخې په پام کې نیول شوي و.
"
