لویې څارنوالۍ عالي شورا غړو لپاره د ستراتیژک پلان جوړنې ورکشاپ پیل شو
د لویې څارنوالۍ عالي شورا غړو لپاره د ستراتیژک پلان جوړنې دوه ورځنی ورکشاپ د حقوقو پراختیا نړیوال سازمان له خوا د کابل په سرینا هوتل کښې دایر شو. په دغه ورکشاپ کښې د افغانستان لوی څارنوال، مرستیالانو او د لویې څارنوالۍ مرکزي رئیسانو ګډون کړی و.
په افغانستان کښې د حقوقو پراختیا نړیوال سازمان رییسه، آغلې "جینیت راین" چې د پروګرام پیل کوونکې وه په خپلو خبرو کښې داسې وویل: "په دې وروستیو څو میاشتو کښې مونږ د یو پروګرام د پیلولو لپاره د لویې څارنوالۍ، سترې محکمې او عدلیې وزارت چارواکو سره خبرې اترې کړې. اوس مونږ موقع پیدا کړه چې د لویې څارنوالۍ عالي شورا غړو لپاره (چې په دغه اداره کښې پریکړه کوونکي مرجع ده) د ستراتیژک پلان جوړونې ورکشاپ په لاره واچوو. موږ به په دغه پروګرام کښې پر تخنیکي طرزالعملونو، د یو ستراتیژیک پلان جوړونې پر څرنګوالي او پلي کولو یې تمرکز وکړو. هیله منه یم چې دغه پروګرام د خپلو نظریاتو شریکولو او د یو بل نه د زده کړې یو ښه فرصت واوسي. "
ښاغلي څارنپوه محمد فرید حمیدي د حقوقو پراختیا نړیوال سازمان همکاریو څخه مننه وکړه او په لویه څارنوالۍ کښې د دغه پروګرام پیلول یې د وړتیاوو لوړولو لپاره یو فرصت وباله او په خپلو خبرو کښې یې وویل: "چې زمونږ دغه پروګرامونه به د نورو ادارو سره هیواد په دننه او دباندې دوام پیدا کړي."
د ښاغلي حمیدي په وینا د دغه پروګرامونو په لاره اچول په دې معنا ندی چې په لوی څارنوالۍ کښې وړتیا شتون نلري. خو په حقيقت کې دا ډول پروګرامونه د يو دقيق او عملي پلان جوړونې لپاره د فرصتونو نه ګټه پورته کول دي. ښاغلي حمیدي زیاته کړه: "مونږ د لوی څارنوالۍ په عالي شورا پر میز ښه وړتیاوې لرو. همدارنګه سترې ستونزمنې جنایي قضیې په همدغه میز فیصله کیږي. د ستراتیژیک اصلاحاتو مشري زمونږ په غاړه ده . دغه پروګرامونه مونږ سره مرسته کوي چې له یوې خوا د فرصتونو نه ګټه پورته کړو او له بلې خوا اوږد مهاله پروګرام او فکر ولرو."
که څه هم لوی څارنوالۍ له دې نه مخکې هم د ستراتیژیک پلان جوړونې پروګرام درلود. دغه پروګرام په ۱۳۹۱ لمریز کال کښې د پنځه کالو لپاره طرح شوی و. خو د ځینو لاملونه له کبله دغه اوږد مهاله پروګرام په سمه او بشپړه توګه پلي نشو. ښاغلي حمیدي وویل: "د لوی څارنوالۍ په مخکیني ستراتیژیک پلان جوړونې پروګرام کښې د ټولنې ځینې حقایق په نظر کښې نیول شوي نه و. همدارنګه د دې پروګرام د پلي کولو لپاره لازمې اسانتیاوې، امکانات او شرایط شتون نه درلود. دغه ورکشاپ مونږ ته دا وړتیا راکوي چې د خپلو وړتیاوو او اسانتیاوو ته په پاملرنې سره د ستراتیژیک پلان جوړونې پروګرام د تطبیق وړ وګرځوو."
د ښاغلي حمیدي په وینا، د لویې څارنوالۍ د مسوولیتونو څخه یو مهم یې د دولتي پالیسیو پیاوړي کول دي. لویه څارنوالي باید له دې وروسته په عامه پالیسیو کښې په فعاله توګه عمل وکړي. او په دې اړه یې وویل: "که څه هم مونږ یوه غیر سیاسي اداره یو؛ خو په عادلانه پالیسیو او هغو تګلارو کښې چې په افغانستان کښې د قانون حاکمیت او عدالت خپریدو کښې مرسته کوي، ګډون وکړو. مونږ هره ورځ له قوانینو سره سروکار لرو. د قوانینو ضعیفه او قوي نقطې د یو څارنوال نه پرته بل چا ته زیاتې څرګندي ندي. مونږ باید د قوانینو خالیګاوې او نیمګړتیاوې حل کړو."
د حقوقو پراختیا نړیوال سازمان د لویې څارنوالۍ یو مهم همکار بلل کیږي. دغه اداره له څو کلونو راهیسې د وړتیاوو لوړولو په لړ کښې او په تخنیکي امکاناتو کښې لویې څارنوالۍ سره همکاري کوي.
"
