د لویې څارنوالۍ عالي شورا غونډه ترسره شوه
د لویې څارنوالۍ عالي شورا غونډه د یکشنبې په ورځ د چنګاښ میاشتې په اتلمسه نېټه د څېړنو په چارو کې د لوی څارنوال مرستیال څارنپوه نور حبیب جلال په مشرِي جوړه شوه.
د غونډې په پیل کښې د لویې څارنوالۍ د کنټرول او څارنې ریاست د اوپراتیفي پیسو د لګښتونو او د کارولو کړنلارې د نهايي کولو په اړه خبرې وشوې.
دا کړنلاره چې په تېره شورا کښې هم وړاندې شوې وه، د اړین اصلاحاتو وروسته د عالي شورا له خوا تصدیق او تصویب شوه.
د غونډې په بهیر کښې د لویې څارنوالۍ د څارنې ریاست په وړاندیز په ولایتونو کښې د دریو تنو څارنوالانو د سرغړونې په اړه بحث وشو.
د اداري فساد سره د مبارزې په تړاو عالي شورا پرېکړه وکړه چې په کاري چارو کښې د څارنوالانو د سرغړونې له امله د دوۍ دندې وځنډول شي او د موضوع روښانه کېدو لپاره دې قضیه وڅېړل شي.
د غونډې په بله برخه کښې دوه موضوعات چې د لویې څارنوالۍ د مشورتي بورډ لخوا عالي شورا ته استول شوي وو د دغه موضوعاتو د تطبیق او نهایي کولو په برخه کښې د شورا لخوا اړین هدایات ورکړل شو.
همدارنګه د دې شورا لخوا د هغه بندیانو په اړه چې قانوني عمر ولري هدایت ورکړل شو چې د ولسمشر فرمان سره سم دې پدې هکله اجراآت ترسره شي.
