د ملي امنیت څارنوالۍ ۱۸ کاري دفترونه ګټې اخيستنې ته وسپارل شول
ملي امنیت څارنوالۍ د بریتانیا سفارت په مالي لګښت ۱۸ کاري دفترونه چې د روان کال د تلې پر ۲۶ يې جوړېدو چارې پای ته ورسېدې، ګټې اخیستنې ته وسپارل. پر نوموړیو کاري دفترونو شاوخوا ۳۰۰ زره امریکايي ډالره لګښت راغلی دی.
د یادو شویو کاري دفترونو په پرانیسته کې د لويې څارنوالۍ مالي او اداري مرستیال وحیدالدین ارغون، د ملي امنیت څارنوالۍ رییس څارنیار شمس الله احمدزي، د بریتانیا سفارت استازې او ګڼو نورو رییسانو ګډون کړی و.
په نوموړې پرانیسته کې وحیدالدین ارغون د دغو کاري دفترونو د جوړولو لپاره د بریتانیا د مالي ملاتړ نه په مننې سره زیاته کړه، چې لویه څارنوالۍ له اداري فساد سره د مبارزې په برخه کلک هوډ لري او د دغې ښکارندې د له منځه وړلو لپاره يې جدي مبارزه پيل کړې ده.
نوموړي زیاته کړه، چې اوسمهال د دغې ادارې په تشکیل کې د ښځینه کارکوونکو تعداد ته هم پوره پام شوی او تر پخوا يې شمېر زیات شوی دی.
بلخوا د ملي امنیت څارنوالۍ رییس څارنیار شمس الله احمدزي د نوموړیو کاري دفترونو پر جوړولو خوښي څرګنده کړه او زیاته يې کړه، چې د یادو شویو دفترونو په جوړولو سره به د دغې ادارې د څارنوالانو د کارونو په تنظیم کې ښه مرسته وکړای شي.
ښاغلي احمدزي همداراز زیاته کره، چې د شعبو د زیاتوالي لپاره نوموړیو دفترونو ته جدي اړتیا لیدل کېده.
له دې سره سم د بریتانیا سفارت استازې له دغې ادارې سره د نورو مرستو ژمنه وکړه او ټینګار يې وکړ، چې له ورته مرستو به مخ نه اړوي.
د یادونې وړ ده، دا کاري دفترونه په اړتیا وړ وسایلو سمبال او د دغې ادارې د څارنوالانو لپاره د ګټې اخيستنې لپاره په بشپړه توګه چمتو دي.
