د څرخي پله له زندان څخه ۹۸ زندانیان ازاد شول
د څرخي پله له زندان څخه ۹۸ زندانیان ازاد او د ۲ نورو د بند موده کمه شوه. دا زندانیان د جمهور رییس د ۱۶۸ نمبر فرمان پر اساس ازاد شوي او د بخښنې وړ بلل شوي دي. نوموړي زندانیان د روان کال د لیندۍ پر ۱۵ ازاد شول.
د نوموړو زندانیانو د ازادېدو پر مهال د لویې څارنوالۍ د احکامو تنفیذ څارنوالۍ رییس او د فرمان پلي کوونکې کمېټې غړي محمد اسعد ساپي، د څرخي پله زندان عمومي رییس مل پاسوال محمد تواب احمدزي او د دغه زندان ځینو مسوولانو ګډون کړی وو.
ښاغلي اسعد ساپي د زندانیانو د ازادېدو پر مهال وویل: «په ژوند کې هر څوک تېروتنه کوي؛ تاسې باید له دغې مودې څخه چې په زندان کې مو تېره کړې، پند واخلئ.»
په ورته وخت کې زندانیانو د محبس له مسوولانو څخه مننه وکړه او زیاته يې کړه، چې د بند په موده کې له دوی سره هیڅ ډول ناقانونه چلند نه دی شوی.
د جمهور رییس د نوموړي فرمان پر اساس له زندان څخه ۹۸ ازاد شویو کسانو په ډله کې ۱۴ مېرمنې هم شاملې وې او له دې سره د دوو نورو مېرمنو د بند موده کمه شوه.
د یادونې وړ ده، چې نوموړي ۹۸ کسان د فرمان د تطبیق په لومړۍ مرحله کې ازاد شول او ټاکل شوې په راتلونکي مرحله کې ځینې نور زندانیان هم ازاد شي.
