د کابل ولایت د عمومي توقیف خونې درې پوړيز بلاک ورغول شو
د کابل ولایت د عمومي توقیف خونې درې پوړیز بلاک د رغونې چارې د جمهور رییس د فرمان له مخې د روان کال د تلې پر ۲۴ بشپړې او نوموړی بلاک ګټه اخیستنې ته وسپارل شو. دا ودانۍ د وخت په تېرېدو سره زړه شوې وه، چې اوسمهال یې د بیارغاونې چارې په بشپړه توګه پای ته رسېدلې دي.
د یادې شوې ودانۍ په پرانيسته کې د احکامو تنفیذ څارنوالۍ رییس محمد اسعد ساپي، د نوموړې توقیف خونې عمومي مدیر او ګڼو نورو افسرانو ګډون کړی و.
هېره دې نه وي، چې نوموړی درې پوړیز بلاک مامورانو، قاضیانو، څارنوالانو، رییسانو، سوداګرو او لوړپوړیو چارکوالو لپاره چمتو شوې دی.
دا ودانۍ د کورنیو چارو وزارت لخوا د شاوخوا یو میلیون افغانیو په لګښت رغول شوې او ۴۸ دوه کسیزې خونې لري.
همداراز د کابل ولایت عمومي توقیف خونه د ۱۶۵۹ کسانو د ساتنې ظرفیت لري. د یادونې وړ ده، چې په نږدې راتلونکي کې به دوه نور بلاکونه هم ورغول شي.
