د لويې څارنوالۍ عالي شورا غونډه ترسره شوه
د لويې څارنوالۍ عالي شورا غونډه د هېواد لوی څارنوال څارنپوه محمد فرید حمیدي په مشرۍ د ۱۳۹۶ کال د تلې پر ۱۶مه ترسره شوه.
د عالي شورا غونډې په لومړۍ برخه کې د احکامو د تنفیذ د نظارت څارنوالۍ د پيشنهادي طرحې په اړه چې له مخې يې هغه کسان چې د قانون د حکم او د باصلاحیته چارواکو د هدایت پر اساس ممنوع الخروج بلل کېږي، بحث وشو.
عالي شورا پرېکړه وکړه، چې یاد پيشنهاد دې د مفهومي بډاینې، غني کولو او کره کولو لپاره د تقنین مؤظفې کمېټې ته وسپارل شي. نوموړې شورا ټینګار وکړ، چې د افرادو ممنوع الخروجي یوه بشري مساله ده او باید په دې برخه کې پوره دقت وشي. هېره دې نه وي، چې دا پیشنهاد به د تقنین د مؤظفې کمېټې تر کتنې او ارزونې وروسته عالي شورا ته د تصویب لپاره بیا راجعه شي.
د غونډې په دویمه برخه کې د څارنوالانو د کادري درجې د حقوق او امتیازاتو د مقررې د تدوین شوې مسودې په اړه بحث وشو.
عالي شورا نوموړې مسوده تر ارزونې او کتنې او په دې مسودې کې تر لازمو پیشهاداتو وروسته په اصول او پرنسیپ کې تصویب کړه او زیاته يې کړه، چې دا مسوده به د لازمو او قانوني اجرااتو لپاره د عدليې وزارت مقام ته رسماً واستول شي.
