د کورنیو چارو وزارت ۶ لوړپوړي کارکوونکي په علني ډول محاکمه شول
د کورنیو چارو د ستراتیژۍ او پالیسۍ مرستیال پاسوال عبدالواسع رؤفي، د لوژستیک عومي مرستیال مل پاسوال تاج محمد فراه وال، د تأمیناتو مرستیال مرتضی رحیمي، د ځواکونو د تنظیم او ادارې ریاست سرپرست مل پاسوال محمد اکبر عبدالرحیمزی، د تدارکاتو رئیس نوید الله بخشي او ډګروال ازاد خان د ۱۳۹۶ کال د مرغومي پر ۱۸ له لویو جرمونو سره د مبارزې عدلي او قضايي مرکز ابتدایه محکمې له لوري په علني ډول محاکمه شول.
په دغه قضايي غونډه کې پاسوال عبدالواسع رؤفي له وظیفوي واک نه د تجاوز په جرم د عسکري جرمونو د ۴۲ او د جزا قانون ۴۵ مادو پر اساس په یو کال او شپږ میاشتې تنفیذي حبس محکوم شو.
مل پاسوال تاج محمد، مل پاسوال اکبر عبدالرحیمزی او ډګروال آزاد خان هم د وظیفوي واک څخه د تجاوز په تور د عسکري جرمونو قانون د ۴۲ او څلورمې او د جزا قانون د ۱۴۵ مادو پر اساس په یو کال او شپږ میاشتو تنفیذي حبس محکوم شول.
له بلې خوا مرتضی رحیمي او نوید الله بخشي د وظیفوي واک څخه د تجاوز په جرم د عسکري جرمونو د درېیمې، څلورمې او ۴۲ او د جزايي اجرااتو د ۲۰۹ مادو پر اساس هر یو په درې کاله تنفیذي حبس محکوم شول.
د نوموړي عدلي او قضايي مرکز د رئیس په وینا، دا حکم وروستی نه دی او تورن د نارضایتۍ په صورت کې د استیناف محکمې غوښتنه کولای شي.
