د عامه نظم قومندانۍ اته کارکوونکي په علني ډول محاکمه شول
د اداري فساد له لویو جرمونو سره د مبارزې عدلي او قضايي مرکز د ۱۳۹۶ کال د سلواغې پر لومړۍ نېټه اته کارکوونکي د تزویر، قاچاق او له وظیفوي واک نه د ناوړه ګټه اخیستنې په جرم په علني ډول محاکمه کړل.
نوموړي عدلي او قضايي مرکز ډګروال آدم خان، څارمن ضیاء الرحمن، ساتنمن منصور، ساتنمن خان سعید او ساتنمن دل آغا له وظیفوي واک څه د ناوړه ګټه اخیستنې په جرم د عسکري جزا د ۴۲ مادې د دویمې فقرې پر اساس هر یو په اته کاله تنفیذي حبس محکوم کړل.
له بلې خوا ساتنمن میر جمال د تزویر او د ۳۳۱ نمبر پنجشېر شخصي نمبر پلېټ د نصبولو په جرم د جزا قانون د ۱۵۸ مادې پر اساس په درې کاله او نهه میاشتې تنفیذي حبس او همداراز د ترافیکو قانون د ۶۱ مادې د دویمې فقرې پر اساس د شپږو زرو افغانیو په ورکړې محکوم شو.
د دغه عدلي او قضايي مرکز قضايي پلاوي څارمن مسعود په خپل سر د دندې د پرېښودو په جرم د عسکري جرمونو قانون د ۱۳ مادې پر اساس په یو کال او شپږ میاشتو تنفیذي حبس محکوم کړ.
په ورته مهال کې ساتنمن عبدالرقیب د جزايي اجرااتو د پنځمې او د جزا قانون د څلورمې مادې پر اساس بری الذمه وګڼل شو.
دغه قضايي پلاوي وویل، چې دا وروستی حکم نه دی او تورن کسان کولای شي، د تمیز محکمې غوښتنه وکړی.
