د افغانستان د اسلامي جمهوریت لوی څارنوال د ماشومانو د روزنې او اصلاح مرکز څخه لیدنه وکړه
د افغانستان د اسلامي جمهوریت لوی څارنوال څارنپوه محمد فرید حمیدي د محجوزانو وضعیت د څارنې په موخه د ماشومانو د روزنې او اصلاح مرکز څخه د ۱۳۹۶ کال د کب پر ۲۶ لیدنه وکړه.
په دغه لیدنه کې د ماشومانو سرغړونو ته د رسېدنې عمومي رئیس محمد داوود افضلي، د مقام دفتر رئیس بکتاش عزیزي، د لویې څارنوالۍ د احکامو پر تنفیذ د څارنې رئیس محمد اسعد ساپي او د څارنوالۍ د ځینو نورو اړوندو برخو مسؤولینو ګډون کړی و.
د هېواد لوی څارنوال څارنپوه محمد فرید حمیدي په دغه لیدنه کې اړوندو مسؤولینو ته هدایت وکړ، چې د بند د کمونې او بښنې فرمانونه پر خپل وخت پلي کړي.
په دغه لیدنه کې د ۱۳۹۷ کال تر راتګ مخکې د ځینو محجوزانو د دوسیو تر ارزونې وروسته د ۱۰ محجوزانو دوسیې د څېړلو په مرحله کې او ۷ نورو دوسیې د محکمې د پرېکړې پر اساس د قوي ضمانت په اخیستلو سره له حجزه ازاد شول.
همدارنګه د محکمو د پرېکړې له مخې، اته دوسیې په ابتدایي محکمه، ۱۴ دوسیې د استیناف په مرحله، ۲۳ دوسیې د تمیز په مرحله کې وې، تر څو د ۱۳۹۷ کال د غویي د اتمې فرمان چې د افغانستان د مجاهدینو د بریا په مناسبت صادرېږي، سرغړونکي ترې برخمن شي.
