د برښنا شرکت درې کارکوونکي محاکمه شول
د افغانستان برښنا شرکت درې کارکوونکي هر یو، د افغانستان برښنا شرکت د تهیې او تدارکاتو پخوانی آمر او د دې ریاست اوسنی مشاور، د تجارتې برخې کارکوونکی محمد حسیب او د دې ریاست په عملیاتي برخه کې د ارزونې پلاوی عبدالغفار د اداري فساد له لویو جرمو سره د مبارزې عدلي او قضایي مرکز د ۱۳۹۶ کال د کب پر ۲۲ د غدر په جرم په علني ډول محاکمه کړل.
د یادې ناستې پلاوي نوموړي کسان د غدر په جرم د ۳۹۵ مادې د دويمې فقرې او د جزا کود د ۱۷، ۵۸ او ۲۱۵ مادو پر اساس په اتو میاشتو تنفیذي بند محکوم کړل.
د مؤظف څارنوال د دعوې پر اساس، نوموړي درې کسان د ۱۵ میلیونه، ۹۳۵ زره او ۵۰۰ افغانیو خسارې په جبرانولو دولت ته ورپېژندل شوي و؛ خو د قضا رئیس په خبره نوموړي تورن دولت ته د خسارې په جبرانولو مکلف نه دي.
د دغې ناستې قضایي پلاوي وویل، چې د افغانستان برښنا شرکت عملیاتي رئیس انجینر شکېب احمد نثار، د دغه شرکت عمومي رئیس عبدالرازق صمدي، د یاد شرکت مالي او اداري رئیس احمد شاه ساحل او د امید جلالیان شرکت مسؤول یوسف انوري، د معاینې پلاوی او داسې نور چې په دغه قضیه کې یې لاس درلود، باید د عدلي مرکز لخوا تعقیب شي.
دا په داسې حال کې ده، چې نوموړي تورن د اداري فساد له لویو جرمونو سره د مبارزې عدلي او قضایی مرکز له خوا په ابتدایي محکمه کې په دوه دوه کاله تنفیذي بند محکوم شوي و.
