د اداري فساد پر ضد پرېکنده خو عادلانه مبارزه کوو
د هېواد لوی څارنوال څارنپوه محمد فرید حمیدي دا خبره د اداري فساد پر ضد د منبر غږ کنفرانس پر دویمه ورځ په ارګ کې وکړه.
د اداري فساد پر ضد د منبر غږ کنفرانس د لويې څارنوالۍ، ارشاد، حج او اوقاف وزارت او د افغانستان د علماوو شورا له خوا د ۱۳۹۷ کال زمري پر شپږمه او اوومه په انترکانتیننتال هوټل او ارګ کې ترسره شو.
په دغه کنفرانس کې جمهور رئيس محمد اشرف غني د اداري فساد په له منځه وړنه کې د علماوو رول خورا اغېزناک وباله. ښاغلي غني په دې اړه وویل: «د منبر له همغږۍ پرته د اداري فساد له منځه وړل ستونزمن دي او که له منبره د اداري فساد پر ضد غږ پورته شي، د دغې ښکارندې پر ضد به مبارزه لا اغېزناکه او ګړندۍ شي.»
جمهور رئیس له دیني علماوو وغوښتل، چې علما لکه څنګه د ټولنې د نورو ستونزو د حل په برخه کې يې غږ پورته کړی، دا ډول دې د اداري فساد له منځه وړنې په برخه کې هم غږ پورته کړي.
نوموړي ټینګار وکړ، د یوې محدودې ډلې له امله چې په اداري فساد کې ښکېله ده، د افغانستان د خلکو شهرت ته زیان اوښتی؛ خو د دغې ډلې پر ضد کلکه مبارزه روانه ده. ښاغلي غني زیاته کړه: «د اداري فساد پر ضد یوې پرېکندې ارادې ته اړتیا ده او د دغې ارادې په رامنځته کولو کې علما رغنده رول لري.»
د ملي یووالي حکومت اجرايي رئيس اداري فساد د حکومت د کمزورۍ او په هېواد کې د ناامنۍ لامل وګاڼه. نوموړی هیله څرګندوي او وايي: «د اداري فساد پر ضد مبارزه د ولس په ارادې پاڅېدلې او ولس پخپله له دغې ښکارندې سر ټکوي او هېواد يې زیانمن کړی دی.»
د ښاغلي عبدالله په وینا، د اداري فساد پر ضد مبارزه زموږ ملي او انساني دنده ده او په دې برخه کې د علماوو همکاري له حکومت سره مرسته کوي، چې د دغې پدیدې پر ضد په اغېزناکه توګه مبارزه وکړي.
لوی څارنوال څارنپوه محمد فرید حمیدي دغه کنفرانس ته په وینا کې وویل، چې د اداري فساد پر ضد مبارزه په دغه کنفرانس پای ته نه رسېږي؛ بلکې دا مبارزه مشارکتي ده او په دې برخه کې د خلکو په ځانګړې توګه د علماوو نظریات پوښتل کېږي.
نوموړي ټینګار وکړ: «د اداري فساد پر ضد مبارزه به پرېکنده خو عادلانه او منصفانه وي او په دغه مبارزه کې به د وګړو انساني کرامت او حقونو ته پوره درناوی کېږي.»
همداراز لوی څارنوال وویل، د یاد شوي کنفرانس راپور به تطبیق په موخه د قانون د حاکمیت او د اداري فساد پر ضد د مبارزې له عالي شورا سره د شریک کړي، چې د عمل جامه واغوندي.
بل پلو دیني عالم محمد ایاز نیازي د اداري فساد پر ضد د منبر پر مبارزې ټینګار وکړ او له حکومته يې وغوښتل، چې د منبر په ملاتړ ودرېږي.
د ښاغلي نیازي په باور، لومړی باید ملت اصلاح شي او د ملت د اصلاح لپار یوازې د دیني علماوو وعظ کافي نه دی؛ بلکې د قانون یوشان تطبیق هم اړین دی.
نوموړی تر رشوت اخیستونکي د رشوت ورکوونکي مخنیوی ګټوره ګڼي او په باور یې رشوت ورکوونکی د اداري فساد یو لوی لامل دی.
د یادونې وړ ده، چې د دغه کنفرانس په پای کې یو اته ماده ييزه پرېکړه لیک هم د علماوو له خوا وړاندې شو، چې په دغه پرېکړه لیک کې اداري فساد غندل شوی او ټینګار شوی، چې دولتي ادارې او دیني عالمان دې د اداري فساد په له منځه وړنه کې خپل مسؤولیتونه ادا کړي. په دغه پرېکړه کې د اداري فساد پر ضد د ښکېلو کسانو پر وړاندې د جدي، پرېکنده او قانوني چلن غوښتنه هم شوې ده.