لویه څارنوالۍ کې د روزونکو د روزنې پروګرام پيل شو

د افغانستان عدلي سکتور د ملاتړ پروګرام (JSSP) د دغې ادارې د بشري سرچینو د پراختیا عمومي ریاست د ظرفیت لوړونې آمریت په مرسته د روزونکو د روزنې (TOT) درې ورځنی پروګرام پيل کړ. دا پروګرام د ‍۱۳۹۷ کال د زمري پر ۲۱ د لويې څارنوالۍ په دارالامان ودانۍ کې پيل شو.

د یاد شوي پروګرام په پرانیسته کې د لویې څارنوالۍ د بشري سرچینو د پراختیا عمومي رئيس محمد ناصر همت وویل، چې په هره اداره کې د کارکوونکو ظرفیت لوړونه د بشري سرچینو د پراختیا ریاست په کاري لومړیتوبونو کې راځي.

ښاغلي همت زیاته کړه: «په راتلونکي کال کې مو هڅه دا ده، چې دا ډول روزنیز پروګرامونه د ولایتونو استیناف او ابتداییه څارنوالیو کارکوونکو ته هم دایر کړو.» ښاغلي همت وویل، چې موږ تر دې وړاندې تر آمرینو د ټيټو پوړیو کارکوونکو ته په بېلابېلو برخو کې ورته کارنده پروګرامونه هم دایر کړي دي.

ښاغلي همت په روزنیزو پروګرامونو کې د مېرمنو پر ګډون ټينګار وکړ او زیاته يې کړه، چې په روزنیزو پروګرامو کې باید د ښځو ونډه پنځوس سلنې ته پورته شي.

د دغه پروګرام موخه د آمرینو له خوا تر لاس لاندې کارکوونکو ښه روزنه ده، چې له دې لارې به آمرین هم وکړای شي، خپلې چارې ښې تنظیم کړي.

په دغه روزنیز پروګرام کې شلو ښځینه او نارینه آمرینو ګډون کړی او د درېیو ورځو لپاره به روزنه ترلاسه کړي.