لویه څارنوالي به ستاسې دوسيې په عادلانه او دقیقه توګه وڅېړي
د هېواد لوی څارنوال څارنپوه محمد فرید حمیدي د کابل امنیه قوماندانۍ د نظارت خونې د لیدنې پر مهال مظنونانو ته په خطاب کې وویل، چې د دوی دوسیې به په دقت وڅېړل شي او له هېچا سره به بې عدالتي نه کېږي.
لوی څارنوال د ۱۳۹۷ کال د زمري پر ۲۳ د کابل امنیه قوماندانۍ د نظارت خونې د لیدنې پر مهال د درېيو مېرمنو په ګډون له ۱۴۵ مظنونانو سره په جلا جلا توګه ولیدل. ښاغلي حمیدي د د مظنونانو د نیولو د دلیل او وخت په اړه له هغوی سره خبرې وکړې او اړوندو مسؤولانو ته يې لارښوونه وکړه، چې د مظنونانو دوسیې دې ژر تر ژره په قانوني ډول وڅېړي.
له دې سره سم لوی څارنوال د کابل امنیه قوماندانۍ د نظارت خونې له خوړنځي څخه هم لیدنه وکړه او اړوندو مسؤولانو ته یې لارښوونه وکړه، چې د مظنونانو د خوړو په برخه کې دې حفظ الصحه جدي مراعات کړي.
په دغه نظارت خونه کې د یوې څېړنخونې د جوړېدو چارې هم بشپړې شوې دي او په نژدې راتلونکي کې به گټنې ته وسپارل شي.
لوی څارنوال تر دې وړاندې هم د روان کال په غبرګولي میاشت کې د کابل امنیه قوماندانۍ د نظارت خونې لیدنه کړې وه.
د یادونې وړ ده، چې د کابل امنیه قوماندانۍ په نظارت خونې کې دمګړۍ د درېيو مېرمنو په ګډون ۱۴۵ مظنونان ساتل کېږي.
