لويه څارنوالي کې د نړيوالو جرمونو په اړه د پوهاوي روزنیز پروګرام وشو
د لويې څارنوالۍ د مسلکي زده کړو انستیتیوت ریاست د نړیوالو جرمونو په اړه د پوهاوي دوه ورځنی روزنیز پروګرام ترسره کړ. دا پروګرام د ۱۳۹۷ کال د تلې پر لومړۍ د مسلکي زده کړو د انستیتیوت په تالار کې وشو.
د نړيوالو جرمونو په اړه د پوهاوي دا پروګرام د قضايي تعقیب په چارو کې د لوی څارنوال مرستیال ډاکټر غلام حیدر علامه او د مسلکي زده کړو انستیتیوت د رئیس ډاکټر عزیزالله فصیحي په لارښوونې ترسره شو.
یاد شوی پروګرام په ځانګړې توګه له نړیوالو جرمونو سره د مبارزې څارنوالۍ د ریاست کارکوونکو لپاره د چارو د ښه ترسراوي په موخه جوړ شوی و او د دغه ریاست نژدې شلو کارکوونکو پکې ګډون کړی و.
د قضايي تعقیب په چارو کې د لوی څارنوال مرستیال وویل، چې په دغه پروګرام کې به د دولت پر ضد د تېري، بشر ضد، جنګي او پر یو شمېر نورو جرمونو باندې د افغانستان د نافذه قوانینو په رڼا کې هراړخیز بحث وشي.
بل پلو د مسلکي زده کړو انستیتیوت رئیس ډاکټر عزیزالله فصیحي هم دا پروګرام د څارنوالانو لپاره ګټور وباله او زیاته يې کړه، چې دا پروګرام به د تحقیق او قضايي تعقیب څارنوالانو لپاره د قضیو په څېړنه کې مرستندوی ثابت شي.
له دې سره سم له نړیوالو جرمونو سره د مبارزې څارنوالۍ رئيس هیله څرګنده کړه، چې په دې برخه کې د څارنوالۍ تر ایجادونې وروسته دې له نړیوالو جرمونو سره د مبارزې ځانګړي پولیس او محکمه هم ایجاده شي، تر څو په ځانګړې ډول د بشر ضد جرمونو د قضیو د څېړنې او محاکمې لپاره یو نهاد ولرو.
له نړیوالو جرمونو سره د مبارزې څارنوالۍ ریاست په روان کال کې تأسیس شوی او د جزا کوډ او د نړیوالو تعهداتو پر اساس د بشر ضد، جنګي جرمونو او نسل وژنې قضیې څېړي.
