د جنډر او د ښځو او ماشومانو د ځورونې د مخنیوي قانون د پوهاوي پروګرام ترسره شو

د لویې څارنوالۍ د جنډر ریاست د عدلي سکتور د ملاتړ پروګرام (JSSP) په ملاتړ د جنډر او د ښځو او ماشومانو د ځورونې د مخنیوي قانون د پوهاوي دوه ورځنی پروګرام د ۱۳۹۷ کال د مرغومي ۹ دایر کړ. په یاد شوي پروګرام کې د دغې ادارې ۴۰ کارکوونکو ګډون کړی و.

د یاد شوي پروګرام په پرانیسته کې د جنډر رئیسې لیدا حیدري وویل، چې په لویه څارنوالي کې د ښځو او ماشومانو د ځورونې د مخنیوي قانون پر اساس یوه کمېټه جوړه شوې او له تاوتریخوالي سره مخامخ شوې مېرمنې، دغې کمېټې ته د ستونزو د حل په موخه مراجعه کولای شي.

اغلې حیدري زیاته کړه، چې د شکایت کوونکي هویت خوندي پاتېږي او د دغې کمېټې له لوري به يې د قضیې تر ارزونې وروسته مربوطه څانګو ته واستول شي.

د دغه پروګرام موخه په لویه څارنوالي کې د جنډر متوازنه پرمختیا، د جنډر پالیسۍ ترتیب او تطبیق، د ښځو او ماشومانو د ځورونې د مخنیوي قانون پوهاوی او مېرمنو ته د خوندي کاري چاپيریال رامنځته کول بلل شوي دي.

د یادونې وړ ده، چې د ښځو او ماشومانو د ځورونې د مخنیوي قانون په ۱۳۹۵ کال کې د ولسي جرګې له خوا تصویب شو او د یاد قانون پر بنسټ دولتي ادارې مکلفې دي، چې د ښځو او ماشومانو د ځورونو ستونزو ته د رسیدګۍ په موخه یوه کمېټه جوړه کړي.