د جنډر او د ښځو د ځورونې د مخنیوي په هکله د پوهاوي پروګرام جوړ شو

د لويې څارنوالۍ د ښځو د ملاتړ ریاست د دغې ادارې ځینو کارکوونکو ته د جنډر، د ښځو د ځورونې د مخنیوي او بشري حقوقو د پوهاوي په هکله د ۱۳۹۹ لمریز کال د لیندۍ پر ۱۸، دوه ورځنی روزنیز پروګرام پيل کړ.

دا پروګرام د دغې ادارې له لویو جرمونو سره د مبارزې عدلي او قضايي مرکز، له نشه يي توکو او مسکراتو سره د مبارزې څارنوالۍ او د کندهار د استیناف څارنوالۍ ځینو نارینه او ښځینه وو کارکوونکو ته جوړ شوی دی.

په دغه دوه ورځني پروګرام کې د جنډر، د جنډر عدالت، د ښځو د ځورونې مخنیوي، د بشري حقوقو د مفاهیمو او ورته ګڼو نورو موضوعاتو په هکله ګډونوالو ته روزنه ورکړل کېږي.

د لویې څارنوالۍ د ښځو د ملاتړ رئیسې لیدا حیدري د یاد شوي روزنیز پروګرام په پرانیسته کې د دغه پروګرام موخه د لويې څارنوالۍ د کارکوونکو ظرفیت لوړاوی وباله.

اغلې حیدري زیاته کړه: «موږ کوښښ کوو، چې په لویې څارنوالۍ کې د ښځینه کارکوونکو له زیاتوالي سره سره د دغې ادارې د ښځینه کارکوونکو ظرفیت لوړ او په ورته وخت کې ورته خوندي کاري چاپيریال رامنځته کړو.»

اغلې حیدري زیاته کړه، د ښځو د ځورونې د مخنیوي کمېټې د رامنځته کولو تر څنګ چې دغې ادارې جوړه کړې، خوندي کاري چاپيریال؛ د ښځو د ځورونې د مخنیوي پر مفاهیمو له پوهېدو او پليتابه سره رامنځته کېدای شي.

د ښځو د ملاتړ ریاست د غونډې له ګډونوالو وغوښتل، چې په دغه ټولګي کې فعاله ونډه واخلي او د مفاهیمو د تطبیق او پياوړتیا لپاره دې پوره پوره هڅه وکړي.

دا دوه ورځنی پروګرام د لويې څارنوالۍ د ښځو د ملاتړ ریاست له خوا د ملګرو ملتونو پرمختیایي پروګرام (UNDP) په تخنیکي مرستې جوړ شوی دی.