د نظامي سکټور کمېټې غړو د کورنیو چارو وزارت له ځینو چارواکو سره ولیدل
د فرمانونو او حکمونو د تعقیب او نظارت لوی ریاست د نظامي سکټور کمیټې غړو چې مشري یې مولوی نجیبالله انوري کوله، د کورنیو چارو وزارت د عامه ساتنې ملي تصدۍ لوی ریاست له عملیاتي معین محترم مولوي عنایتالله، ترافیک پولیسو ریاست عمومي رییس پاسوال حسیبالله مختار او حقوقو ریاست له عمومي رییس محمدسلیم حقاني سره په جلا ډول تعارفي ناستې وکړې.
دا ناستې چې د ۱۴۴۴هـ.ق کال د شوال المکرم پر ۱۱ وشوې، پکې د یاد وزارت چارواکو ته د ا.ا.ا مشرتابه ۳۲ ګڼې فرمان په تړاو اړین او هراړخیز معلومات وړاندې شول.
د ا.ا.ا مشرتابه ۳۲ ګڼه فرمان چې په دې وروستیو کې صادر شوی، د فرمانونو او حکمونو د تعقیب او نظارت لوی ریاست د دندو او واکونو په تړاو پکې معلومات وړاندې شوي دي.
د دې ناستو موخه د ا.ا.ا د مشرتابه د فرمانونو او حکمونو له پلیتابه ډاډ ترلاسه کول او په دې تړاو ټولو دولتي او غیردولتي ادارو ته معلومات ورکول دي.
بل خوا د کورنیو چارو وزارت چارواکو د فرمانونو او حکمونو لوی ریاست له جوړېدو خوښي څرګنده کړې او ډاډ یې ورکړی، چې د امیرالمومنین ټول فرمانونه او حکمونه به په ښه ډول عملي او په دې برخه کې به په هراړخیزه همکاري وکړي.
ياده دې وي، چې د ا.ا.ا مشرتابه د فرمانونو او حکمونو د تعقيب او نظارت لوی رياست ته دنده سپارلې، چې په مرکز او ولايتونو کې د بېلابېلو کمېټو په جوړولو سره په ملکي، نظامي او خصوصي سکټور کې د مشرتابه د فرمانونو او حکمونو د پلي کېدا څرنګوالی وڅاري او راپور يې مشرتابه ته وړاندې کړي.
په همدې موخه دغه لوی رياست په مرکز او ولايتونو کې د بېلابېلو کمېټو په جوړولو سره بېلابېلو سکټورونو لپاره کمېټې جوړې کړې دي او د فرمانونو او حکمونو د تعقيب لړۍ روانه ده.
