د روان کال د لويې څارنوالۍ عالي شورا لومړنۍ ناسته د افغانستان لوى څارنوال څارنپوه محمد فريد حميدي تر مشرۍ لاندې تر سره شوه
دغه ناسته د وري په ديارلسمه (١٣) نېټه د لويې څارنوالۍ د مرستيالانو او مرکزي رئيسانو په شتون کې تر سره شوه.
د ناستې په پيل کې لوى څارنوال څارنپوه محمد فريد حميدي د افغانستان خلکو او د لويې څارنوالۍ کارکوونکو ته د نوي کال مبارکي وويله او په دې نوي کال کې يې د هېواد خلکو ته سولې او امنيت او د لويې څارنوالۍ کارکونکو ته د افغانستان خلکو لپاره د لوى خداى ج څخه د خدمت کولو دعاګانې وغوښتې.
په همدې حال کې يې غلام حيدر علامه ته د لويې څارنوالۍ د قضائې تعقيب په چارو کې د مرستيالۍ د دندې مبارکي وړاندې کړه او نوموړى ته يې په ور سپارل شوي دنده کې د برياليتوبونو هيله څرګنده کړه او ور سره يې د لويې څارنوالۍ د قضائې تعقيب په چارو کې د مخکيني مرسيتال څارنپوه عنايت الله کمال څخه د تر سره کړي چوپړ مننه وکړه. په پاى کې د څيړنو رياست پر وړانديز چې د لويې څارنوالۍ د رياستونو د معلوماتي استعلام په اړه ؤ بحث وشوو.
د ياد وړانديز پر بنسټ د دغو معلوماتو لاسته راوړل شاوخوا شپږ مياشتې وخت نيسي، چې د دوسيو د څيړنې بهير د ځنډ او خنډ سره مخ کوي.
د دې استعلامونو د ځواب ور کولو لپاره کوم ځانګړى قانوني وخت نه دى ټاکل شوى، چې دغه تشه د ناوړه ګټې اخيستنې سبب ګرځيداى شي.
عالي شورا د څيړنو رياست ته دنده وسپارله، تر څو خپل کلنۍ راپور جوړ، مرکزي او ولايتي رياستونو ته يې وليږي. لوى څارنوال د لويې څارنوالۍ ټولو مرکزي او ولايتي ادارو ته لارښوونه وکړه، چې څومره ژر کيداى شي خپل راپورونه د څيړنو رياست ته وسپاري.
د ناستې په پاى کې د جمهوري رياست د جزاګانو د بخښنې او کمښت فرمان په اړه د احکامو پر پلي کيدو د څارنې څارنوالۍ رياست پر وړانديز خبرې اترې وشوې.
عالي شورا پريکړه وکړه، تر څو عدليې وزارت د جزاګانو د بخښنې او کمښت فرمان اړين تفسير وړاندې کړي.
