د څرخي پله له زندان څخه ۱۱۶ زندانیان ازاد شول
د څرخي پله له زندان څخه ۱۱۶ زندانیان ازاد او د ۱۸۰ نورو د بند موده کمه شوه. نوموړي زندانیان د جمهور رییس د ۱۶۸ ګڼې فرمان د پلي کېدو د دویم پړاو له مخې چې د مېلاد النبي په مناسبت صادر شوی و، ازاد شول.
د دغو زندانیانو د ازادېدو پر مهال د احکامو تنفيذ څارنوالۍ رییس محمد اسعد ساپي، د څرخي پله زندان عمومي رییس مل پاسوال محمد تواب احمدزي او د فرمان د پلي کوونکې کمېټې غړیو حضور درلود.
د نوموړو ۱۱۶ زندانیانو په ډله کې درې مېرمنې او ۱۵ محجوزان هم شامل دي او له دې سره سم د دغه فرمان له مخې د ۱۸۰ زندانیانو د بند موده هم کمه شوې ده.
د یادو شویو زندانیانو د ازادېدو پر مهال د احکامو تنفیذ څارنوالۍ رییس وویل، چې پخوا به د زندانیانو د ازادېدو فرمانونه په ځنډ پلي کېدل، خو اوس د فرمانونو د پلي کوونکې کمېټې د هڅو له برکته په لنډه موده کې پلي کېږي.
ښاغلي ساپي ټینګار وکړ: «موږ کوښښ کوو، هغه زندانیان چې نن ازادېږي، سبا ته پاتې نه شي او پر هماغه ورځ يې باید ازاد کړو.»
د څرخي پله زندان رییس مل پاسوال محمد تواب احمدزي خوشي شویو زندانیانو ته وویل، چې په راتلونکې کې دې له جرمي کړنو ځان وساتي. د دې تر څنګ ازاد شویو زندانیانو هم ژمنه وکړه، چې له جرمي کړنو به ځان ساتي او عادي ژوند ته به دوام ورکوي.
د یادونې وړ ده، د جمهور رییس د نوموړي فرمان د پلي کېدو په لومړي پړاو کې د څرخي پله له زندان څخه ۹۸ زندانیان ازاد او د دوو نورو د بند موده کمه شوې وه.
